ملګري ملتونه: د افغانستان راتلوونکې په اړه اندېښمن یو 

د ملګرو ملتونو د بشري چارو سرمنشي مارتین ګریفت له سکای نیوز سره په مرکه کې وویل، افغان ولس له لوږې او قحطۍ سره مخ دی او د حکومت پر سر باید له ولس سره دښمني ونه پالل شي.

ګریف وايي، په افغانستان کې چې هر ډول حکومت وي، باید د هغوی لپاره ولس له لوږې او قحطۍ سره مخ نه شي.

ګریفت زیاته کړه:« بشري مرستې په دې اصولو وېشل کېږي، چې څومره ورته اړتیا وي. دا اړینه نه ده، چې څوک حکومت کوي. موږ ته مهمه دا ده، چې خلک ورته اړ دي. افغانستان سره مرستې باید غیر مشروطې وي. زه مرستندویه هېوادونو ته وایم، چې موږ ته پیسې راکړي، ترڅو اړمنو کسانو ته یې ورسوو.»

مارتین ګریفت ډېره اندیښنه د ماشومانو د راتلونکي په اړه څرګنده کړه.

د ګریفټ په خبره، اوس مهال د دوی مرستې څلور میلیونه افغانانو ته رسېدلي، خو په خبره یې دا ځکه بسنه نه کوي، چې شااوخوا نیمايي برخه نفوس له بد وضعیت سره مخ دی.

ګریفت زیاتوي:«موږ اوس مهال په افغانستان کې څلور میلیونه کسانو ته خوراکي توکي رسولي دي. زموږ اندېښنه د دې لپاره زیاتېږي، چې دا مرسته بسنه نه کوي. ژمی هم را روان دی. موږ باید د خوړو له نړیوال سازمان سره په مرسته درې چنده نورې زیاتې مرستې هم ورسو. که خلک که ډوډۍ ونه لري، ډېره به سخته وي.»

ګریفټ په دغه مرکه کې د جي شل هېوادونو له مشرانو هم وغوښتل، چې افغانستان له اقتصادي پلوه له سقوط سره مخ دی او باید ډېره پاملرنه ورته وشي.

اخوا د خوړو نړیوال سازمان یا ډبلیو اېف پي هم اوونۍ وړاندې له افغانانو سره د مرستې لپاره د ۲۰۰ میلیون ډالرو غوښتوونکی شوی دی.