پاکستان او خيبرپښتونخوا کې د افغان کډوالو د اوسېدو لپاره د قانوني مودې له پای ته رسېدو وروسته، د افغان کډوالو د نیولو او په زور ستنولو لړۍ چټکه شوې ده.
د کډوالو او راستنېدونکو چارو وزارت ویاند له شمشاد سره مرکه کې وایي، له تېرو ۷ ورځو راهیسې شاوخوا ۹ زره افغان کډوال هېواد ته راستانه کړای شوې دي.
عبدالمطلب حقاني د کډوالو موضوع دوه اړخېزه بولي او په کډه د یوه مکانېزم تر رامنځته کېدو پورې د افغان کډوالو د نه ځورول کېدو غوښتنه کوي.
حقاني په دې اړه وايي: « که د نن ورځې راستنې شوې کورنۍ هم ورسره حساب کړو، نږدې ۱۰۰۰ کورنۍ کېږي چې په کې له ۸ تر ۹ زرو کسان شامل دي.»
په ورته وخت کې د کډوالو او راستنېدونکو چارو وزارت سرپرست مولوي عبدالکبیر پر مشرۍ ناسته کې له پاکستانه د راستنېدونکو افغانانو لپاره د اسانتیاو پر رامنځته کولو خبرې شوې.
مولوي عبدالکبیر ټينګار کړی چې د راستنېدونکو افغانانو د ثبتولو لپاره دې ډيورنډ فرضي کرښې ته څېرمه د اړتیا وړ امکانات برابر شي او د لا زیاتو مرستو د جلبولو لپاره دې له نړیوالو بنسټونو سره هم همغږي زياته شي.
د کډوالو او راستنېدونکو چارو وزارت ویاند په دې اړه وايي: « افغانان چې کله ایران یا پاکستان ته مهاجر شول، یوه یې هم قانوني کارت، پاسپورټ یا ویزه نه درلودل، خو دغو هېوادونو اجازه ورکړه. اوس هم باید له افغانانو سره انساني چلن وشي او موضوع سیاسي نه شي. له نړیوالو هم غوښتنه لرو چې خپل مسوولیت اداء کړي. د مهاجرانو د حقونو نقضول د نړیوالو اصولو او قوانینو نقضول دي او دوی باید اجازه ورنه کړي چې د دوی قوانین نقض شي.»
له پاکستان را ایستل شوي افغانان شکايت کوي چې د پاکستان حکومت يې د اخراج پرمهال شتمني او ان د کور لوښي ضبط کړي دي.
د کډوالو او راستنېدونکو چارو وزارت دا کار غير اصولي بولي او ډاډ ورکوي چې ټول وسايل به يې سلامت افغانستان را انتقال شي.
حقاني په دې اړه وايي: « دا موضوع موږ له پاکستاني چارواکو سره شریکه کړې ده. کله چې تېره ورځ ویډیوګانې نشر شوې، یقینا ً زړه بږنوونکې وې. موضوع له پاکستاني چارواکو سره شریکه شوې او اطمینان یې راکړی چې داسې څه به نه پېښېږي.»
له دې سره، د کډوالو د حقونو مدافعان د کډوالو نړيوال ملاتړي بنسټونه مکلف بولي چې په پاکستان کې د افغان کډوالو ستونزو ته رسېدنه وکړي.
د کډوالو د حقونو مدافع علي رضا کریمي وايي: « اسلامي امارت هم دنده لري چې د فعالې ډېپلوماسۍ په کارولو سره د خپلو وګړو له حقونو دفاع وکړي او موضوع د نړیوالو بنسټونو له لارې تعقیب کړي.»
دا په داسې حال کې ده چې د پاکستان دفاع وزیر له دغه هېواده د افغان کډوالو د جبري ایستلو له پرېکړې ننګه کړې.
خواجه اصف د دې پرېکړې مخالفان د پاکستان دوښمنان بللي او ویلي يې دي چې له افغان کډوالو سره د ټولو شویو ښېګڼو او احساناتو سربېره، دوی تل د پاکستان د ګټو مخالفت کړی.
