مجاهد: ترکمنستان له افغانستان سره د همکارۍ ټټر وهلی

 د اسلامي امارت ویاند، ذبیح الله مجاهد ویلي، ترکمنستان پر ټاپي او رېل پټلۍ پروژو سربېره، امنیتي او اقتصادي برخو کې له افغانستان سره دهمکارۍ ټټر وهلی.

ذبیخ الله مجاهد وایي، د ريل پټلۍ د جوړېدو او پر دوه استقامتونو کې د ترکمنستان او جوزجان او ترکمنستان ــ هرات پورې د ريل پټلۍ د جوړېدو ژمنه وشوه، چې کار به يې ژر پيل شي.

د مجاهد په وینا، له ترکمنستانه تر هرات پورې د ۵۰۰ ولټه برېښنا د انتقال لپاره به د نوی لين پر جوړېدو کار پیل شي، چې د برېښنا لېږد ته به زمینه برابره شي.

مجاهد زیاته کړې، ترکمنستان په سیاسي برخه کې هم د خپلو همکاريو ژمنه کړې او د افغانستان په استقلال يې تاکيد کړی.

له یاد هېواده راغلي پلاوي هيله ښودلې، چې نور هېوادونه بايد د افغانستان په داخلي مسائلو کې مداخله ونه کړي.

ترکمنستاني لوري دغه راز ژمنه کړې، چې په اوسنيو سختو شرائطو کې به له افغانانو سره خپلو پراخه بشردوستانه مرستو ته هم دوام ورکړي.