د ټرانسپورټ او هوايي چلن وزارت له خوا د کابل اړوند څرخي پله سیمه کې د ختيځ ولايتونو مسافر وړونکو موټرو لپاره د ترمینل جوړولو چارې پیل او شاوخوا ۱۸ میاشتو کې به ګټې اخستنې ته وسپارل شي.
د دغه وزارت چارواکي وايي، دا ترمینل په ۷.۳ جرېبه ځمکه کې د ۱۶۲ میلیونو افغانیو په لګښت جوړېږي چې ټولې اړينې اسانتیاوي به ولري.
دوی زیاتوي چې د ياد ترمینل د چارو په بشپړېدو سره به د موټر چلوونکو او مسافرو زیاتې ستونزې حل شي.
د ټرانسپورټ او هوايي چلن وزارت مالي او اداري معین صدیقالله عابد وايي: « له دې ځای څخه ننګرهار، لغمان، کونړ او نورستان ولایتونو او تورخم ته ټرانسپورټي وسایط فعالیت لري. هره ورځ له ۲زرو څخه زیات کوچني موټر له دې ځایه یادو ولایتونو ته ځي راځي. دا ترمینل به د ټرانسپورټ وزارت له خوا د ۱۶۲ میلیونو افغانیو په لګښت د خصوصي شرکت له خوا جوړ شي.»
چارواکي وايي، د ټرانسپورت او هوايي چلن وزارت تېر کال د ۳.۸ میلیارده افغانیو په ارزښت شاوخوا ۵۸ پروژې بشپړې کړې دي.
د دوی په خبره، ټاکل شوې روان کال په کندهار او ننګرهار کې د ورته ترمینلونو د جوړولو چارې هم پيل شي.
په ورته مهال، د اقتصاد وزارت سرپرست دین محمد حنیف وايي، تېر کال په ټول هېواد کې د شاوخوا ۳۳۷ پروژو چارې پیل شوې وې چې یو شمېر يې بشپړې او د ځینو يې لاهم کارونه روان دي.
حنيف په دې اړه وايي:« په تېر ۱۴۰۳ کال کې تقریبا ً ۳۳۷ پروژې د اسلامي امارت له لوري منظورې شوې چې ټولې یې د اسلامي امارت له خپلې بودیجې او کورنیو عوایدو تمویل کېږي.»
بله خوا، د کور او ښار جوړولو وزارت سرپرست د بې کارۍ زياتوالي له امله اندېښنه وښوده او زیاته يې کړه چې لا هم زیات شمېر ځوانان د بېروزګارۍ له امله نورو هېوادونو ته په سختو او قاچاقې لارو روان دي.
حمدالله نعماني د سرپرست حکومت له نورو لوړپوړو چارواکو غوښتنه وکړه چې خلکو ته د کاري فرصتونو رامنځته کولو لپاره جدي هڅې وکړي.
هغه زیاتوي: « موږ ټول باید هڅې وکړو او داسې پروژې په لارو واچوو چې زموږ ځوانانو ته په کې د کار زمینه برابره شي. زموږ د ځوانانو تصورات بلکل الوتي دي، ډېری یې په دې فکر کوي چې څنګه کولی شي ایران، پاکستان، دوبۍ او بهرنیو ملکونو ته ولاړ شي. ولې زموږ له ځوانانو سره داسې تصور شته؟ علت یې دا دی چې دلته یې خپل کور وران دی او کار نه لري.»
د ټرانسپورت او هوايي چلن وزارت د مالوماتو له مخې، د اسلامي امارت د مشرتابه په لارښوونه شاوخوا ۲۲ زره جرېبه ځمکه مسافرو ته د اسانتياوو رامنځته کولو په موخه د ترمينلونو جوړولو لپاره ځانګړې شوې چې د زیاتو هغو د جوړولو چارې بشپړې شوې دي او د ځینو يي کارونه روان دي.
