مجاهد: که نړۍ غواړي له افغانستانه ورته ګواښ پېښ نه شي؛ اسلامي امارت دې  پر رسمیت وپېژني

د اسلامي امارت ویاند ذبیح الله مجاهد پرون خبریالانو ته ویلي، د افغانستان پر رسمیت پېژندنه دوه اړخیزه اړتیا ده او په خبره یې اخر به نړیوال مجبور شي، چې افغانستان پر رسمیت وپېژني.

ذبیح الله مجاهد ویلي، یوازې افغانستان پر رسمیت پېژندلو ته اړتیا نه لري، بلکې هېوادونه هم اړ دي، چې اسلامي امارت پر رسمیت وپېژني.

د مجاهد په وینا، که دنیا له اسلامي امارته د امنیت خوندیتوب غوښتنه کوي، نو باید د یو مسوول لوري په توګه یې پر رسمیت وپېژني، چې بیا به دوی هم خپله دنده او د هغوی پر وړاندې مکلفیتونه پر ځای کړي.

نوموړي ویلي، د نړیوالې ټولنې او ملګرو ملتونو لخوا د رسمیت پېژندلو لپاره څلور اساسي شرطونه اېښودل شوي، چې هغه د ټولې خاورې واکمني، حاکم نظام، له افغانستانه نورو هېوادونو ته د ګواښ نه شتون، خلکو ته د سم ژوند امکان برابرول دي، چې دوی پوره کړې دي.