د بدخشان ولایت په مرکز فیض اباد کې د لاسي صنایعو یوه کارخونه د یوې ښځې له خوا جوړه شوې، ترڅو نورې ښځې په کې کار وکړي او عاید ترلاسه کړي.
د دې کارخونې په جوړېدو سره، شاوخوا ۸۰ ښځو او نجونو ته د بېلابېلو لاسي صنایعو په برخو کې د کار زمینه برابره شوې ده.
د لاسي صنایعو کارخونې مسووله عاصمه غفوري وايي: « دلته ۸۰ تنې د غالۍ اوبدلو، رغزه اوبدلو، خیاطۍ، دست دوزۍ، دو رویه دوزۍ، اوبدلو او قناتۍ په برخو کې کار کوي.»
د غفوري په خبره، دلته بوختې ښځې او نجونې د غالۍ اوبدلو، خیاطۍ، دست دوزي او نورو برخو کې کار کوي.
دلته په کار او حرفوي زده کړو بوختې نجونې وايي، د دوی پر مخ د ښوونځیو او پوهنتونونو د دروازو له تړل کېدو وروسته یې یادو زده کړو ته مخه کړې.
دا نجونې او ښځې د کار له زده کړې د خوښۍ ترڅنګ له سرپرست حکومته غواړي چې له دوی ملاتړ وکړي او لا ډېرې کاري زمینې ورته برابرې کړي.
د حرفوي زده کړو یوه زده کوونکې زبیده وايي:« زه خوشاله یم چې د کار زمینه برابره شوې او زه دلته کار کوم. غواړم ښځو ته د کار نور فرصتونه هم برابر شي.»
د حرفوي زده کړو یوه بله زده کوونکې مریم وايي: « په داسې حال کې چې ښځو ته د کار فرصتونه نه شته، زه خوشاله یم چې لږترلږه خیاطي کولی شم. دا زموږ لپاره هم مصروفیت دی او هم کولی شو عاید ترلاسه کړو.»
بل پلو یو شمېر نورې نجونې چې دامهال له زده کړو محرومې دي، له سرپرست حکومته غواړي چې د دوی پر مخ د ښوونځیو او پوهنتونونو دروازې خلاصې کړي.
د بدخشان اوسېدونکې شهره وايي: « دلته زموږ استاده په یوه ځانګړې سبک درس راکوي، خو موږ وسایل نه لرو، البته کولی شو کوچني وسایل خپله برابر کړو، خو لویې خونې او ماشینونو ته اړتیا لرو.»
د حرفوي زده کړو زده کوونکې حسینه وايي: « له اسلامي امارت غوښتنه کوم چې د ښوونځیو دروازې خلاصې کړي. همدارنګه غواړو د کاري فرصتونو او حرفوي زده کړو په تړاو هم له موږ سره مرسته وشي.»
په ورته مهال د بدخشان د صنعت او سوداګرۍ ریاست مسوولین وايي، د نړیوالو مرستندویه بنسټونو په همغږۍ یې روان کال په بېلابېلو برخو کې له شاوخوا ۶۰۰ ښځو ملاتړ کړی.
د بدخشان د صنعت او سوداګرۍ ریاست د تشبثاتو مدیر ثمرالدین رحماني وايي: « ټاکل شوې دلته د اکتید دفتر په همکارۍ یو ټرېننګ سنټر جوړ شي، د دې مرکز تفاهم لیک هم لاسلیک شوی دی. په دې سره به د دې ځای طرحې او ډیزاینونه بهرنیو مارکېټونو ته لاره پیدا کړي. موږ په دې موضوع کار کوو او دا د ښځو لپاره یو ښه زېری دی.»
دا په داسې حال کې ده چې د بدخشان د صنعت او سوداګرۍ ریاست د مسوولینو له مالوماتو سره سم، دا مهال د دې ولایت په مرکز فیض اباد او ګڼو ولسوالیو کې څه باندې زر ښځې په سوداګریزو فعالیتونو بوختې دي چې په خبره یې دا شمېرې ورځ تر بلې د ډېرېدو په حال کې دي.
