په هرات ولایت کې د اختر خوښیو نمانځنې ځينو کورنيو ته ترخې خاطرې پرځای پرېښودې.
د دې ولایت حوزوي روغتون چارواکي وايي، تېره اوونۍ د اختر په شپو او ورځو کې ټرافیکي پېښو بې مخینې زیاتوالی درلود او له امله یې ۶۸۵ کسان ټپیان او شاوخوا ۱۳ کسانو ژوند بایللی.
د هرات حوزوي روغتون د بېړنۍ څانګې آمر بلال ناصر فقیریار وايي: « موږ ته ټولټال ۶۸۵ تنه له ټرافیکې پېښو بېړنۍ خونې ته راوړل شوي چې له بده مرغه ۱۳ تنو په کې ژوند له لاسه ورکړی. باید ووایم چې د ټرافیکي پېښو له امله د فوتي پېښو شمېر له دې ډېر لوړ دی، خو ډېر یې موږ ته نه دي راوړل شوي.»
د هرات اوسېدونکي په ورته مناسبتي ورځو کې د ټرافیکي پېښو زیاتوالی د اندېښنې وړ بولي او له کورنیو غواړي چې د مخنیوي لپاره دې نقليه وسايط د ماشومانو او يا هم د داسې کسانو په لاس نه ورکوي چې د موټر چلول یې زده نه وي.
د هرات اوسېدونکی غلام حضرت وايي: « موږ له ټرافیکي پېښو ډېرې بدې خاطرې لرو او ګڼ ځوانان مو له لاسه ورکړي. له کورنیو غوښتنه لرم چې د خپلو اولادونو مخه ونیسي او د موټرسایکل د ځغلولو اجازه ورنه کړي.»
د هرات یو بل اوسېدونکی ګل احمد وايي: « له کورنیو غوښتنه کوم چې ماشومانو ته موټر او نور وسایط په لاس ورنه کړي، ځکه ځان او نور خلک ژوبلوي.»
د هرات ښار اوسېدونکی جواد وايي: « هغه څوک چې په ډېر سرعت موټر چلوي، یوځل دې راشي او د روغتون حالت دې وګوري. دا کار ډېر ناسم کار دی، هم خپله ځان ژوبلوي او هم نور کسان. باید ډېر احتیاط وکړي او له ډېر سرعت ډډه وکړي، ځکه ښه پایله نه لري.»
د هرات حوزوي روغتون مسوولینو د مالوماتو له مخې، د ټپیانو په ډله کې ډېری ماشومان او ځوانان شامل دي چې د موټرسایکل چټک ځغلولو، بې احتیاطۍ او د ټرافیکي قوانینو نه رعایتولو له امله یې ځانونه او نور کسان ژوبل کړې دي.
