د هېواد په بېلابېلو ولایتونو کې د تېر اوونۍ په لومړيو څلورو ورځو کې د ترافيکي پېښو له امله لسګونه کسانو ته مرګ ژوبله اوښتې.
د کورنیو چارو وزارت د ټرافیکو عمومي ریاست د یوې خبرپاڼې په خپرولو سره ویلي، د روژې له ۲۹مې نېټې د کوچني اختر د درېیمې ورځې تر پای پورې په ټول هېواد کې ۸۰ ترافیکي پېښې رامنځته شوې دي.
خبرپاڼه زیاتوي، په دغو پېښو کې د دوو ښځو او نهو ماشومانو په ګډون ۳۰ تنه مړه او د اتو ښځو او ۳۰ ماشومانو په ګډون ۱۵۵ تنه نور ژوبل شوې دي.
د خبرپاڼې یوه برخه: «په دغو ۸۰ ترافیکي پېښو کې ۳۰ تنه شهیدان او ۱۵۵ تنه نور ټپیان شوې دي. په شهیدانو کې ۱۹ تنه نارینه، ۲ تنې مېرمنې او ۹ تنه ماشومان شامل دي او په ټپیانو کې ۱۱۷ تنه نارینه، ۸ تنې مېرمنې او ۳۰ تنه ماشومان شامل دي.»
د ترافیکو عمومي ریاست د مالوماتو له مخې، د ترافيکي پېښو له امله د مړو شويو کسانو دا شمېره د تېر کال پرتله شاوخوا ۲۰ سلنه کموالی ښيي.
د خبرپاڼې یوه برخه: تېر کال بیا د اختر په څلورو ورځو کې ټولټال ۹۸ ترافیکي پېښې رامنځته شوې وې چې په پایله کې یې ۵۰ تنه شهیدان او ۱۸۵ تنه ټپیان شوي وو.»
د ترافیکو عمومي ریاست دغه راز وايي، هېوادوالو ته د عامه پوهاوي ورکول، د ترافیک پولیسو او امنیتي ځواکونو له خوا د اختر په شپو ورځو کې د امنیتي تدابیرو نیول د دې لامل شوي چې سږ کال په ټول هېواد کې د ترافیکي پېښو او د دغو پېښو له امله د مرګ ژوبلې کچه راتیته شي.
