که څه هم د مارچ ۳۱ مې نېټې ته د ګوتو په شمار ورځې پاتې دي، خو پاکستان تراوسه له فشارونو او غوښتنو سره د افغان کډوالو د جبري ایستنې پر پلان غور نه دی کړی.
تازه د پاکستان کورنیو چارو وزارت پر مشرۍ یوه غونډه کې ټېنګار شوی چې په اسلام اباد او راولپنډۍ کې مېشتو هغه افغانانو ته چې له وړاندې ورته د وتلو خبرداری ورکړل شوی، د ایستلو پر وړاندې دې عملي اقدام وشي.
بله خوا، په دې هېواد کې مېشت افغان کډوال وايي پاکستاني پوځیان يې له دې امله کورونه ورانوي چې له دې هېواده وتلو ته مجبور شي.
په پاکستان کې مېشت افغان کډوال ملک مجاهد شینواری وايي:« نو په دې خاطر د اسلامي امارت له حکومت غوښتنه کوو، که هرڅومره ستونزې وي، پاکستان زموږ ګاونډی هېواد دی او راشئ د پاکستان له ملکي او نظامي حکومت سره خبرې وکړئ، ترڅو د ضرب الاجل نېټه اوږده شي یا ختم شي.»
له دې سره سم، د نړیوالو اړیکو او سیاسي چارو کارپوهان هم په اسلام اباد کې د افغان کډوالو پراوسني حالت اندېښنه څرګندوي او وړاندیز لري چې په پاکستان کې د مېشتو افغان کډوالو ناسم وضعيت ته دې رسېدنه وشي.
دوی د ملګرو ملتونو له سترې کمېشنرۍ او بشري حقونو اړوندو بنسټونو غواړي چې د افغان کډوالو د توقیف په اړه یادو اندېښنو ته جدي پام وکړي.
د کډوالو د حقونو مدافع عبدالرازق عدیل وايي:« له بلې خوا افغانستان سره د پاکستان پېچلې ډېپلوماټیکې اړیکې او له ژور سیاسي او امنیتي اختلافونو رامنځته شوی سیاسي فشار لامل شوي چې پاکستان د افغانستان پر حکومت د فشار واردولو د یوې وسیلې په توګه د کډوالو له اخراج ګټه پورته کړي. نړیوال بنسټونه او د بشري حقونو مدافع ټولنې باید د اخراج پر پروسو دقیقه څارنه ولري.»
سرپرست حکومت هم له پاکستانه د افغان کډوالو د جبري ايستلو پر تګلاره نیوکه لري او دغه چاره د کابل او اسلام اباد د اړیکو پر زيان بولي.
د اسلامي امارت مرستيال وياند حمدالله فطرت د افغان کډوالو له کوربه هېواد غواړي چې د زور زياتي او جبري ايستلو پیل کړې لړۍ دې ودروي.
فطرت زیاته کړې:« له هغوی غوښتنه کوو چې په جبري توګه د افغانانو د ستنولو مخه ونیسي او له داسې پرېکړو لکه د مارچ ۳۱ مه چې افغانان به مجبوره کېږي، په زور او جبر سره به خپل هېواد ته استول کېږي، دا ناسمه پرېکړه کړه ده او د دغو افغان مهاجرانو پر حق تېری دی. د مهاجرت د اصولو له مخې هم دوی نه شي کولی چې یو څوک په جبر او ناڅاپي توګه له خپل هېواده وباسي.»
دا په داسې حال کې ده چې د بښنې نړیوال سازمان هم له پاکستانه د افغان کډوالو د جبري ایستلو د طرحې لغوه کېدوغوښتنه کړې وه.
د سویلي آسیا په چارو کې د دې سازمان یوه سیمه ییز مسوول ویلي، دا پرېکړه د پاکستان د حکومت له ژمنو او د بشري حقونو د سازمانونو له تکرارې غوښتنو سره په ټکر کې ده.
