Skip to content
د خوست ولایت ګربزو ولسوالۍ په ګلان پنډغالي کې مېشت وزیرستاني کډوال وایي، د ژمي په را رسېدو سره یې ژوند سخت شوی دی.
دوی وايي، په ټولییز ډول د خوراکي او سون توکو له کموالي سره مخ دي او ګڼې کورنۍ سرپناه نه لري او له اسلامي امارته او نړیوالې غواړي، لاسنیوی یې وکړي.
ګلان پنډغالي کې مېشت یو تن کډوال وايي:« تاسو ګورئ، چې ژمی راغلی، خو ورسره موږ هېڅ تیاری نه لرو. موږ د خوړو لپاره څه نه لرو، لرګيو او کمپلو ته مو هم اړتیا ده، که اسلامي امارت وي، یا نور له موږ سره دې مرسته وکړي.»
د ګلان پنډغالي کې میشت یو بل ګډوال وايي:«موږ خو دلته راغلي یو. نه تجارت لرو، نه پوله او پټی لرو، تر شنه اسمان لاندې پراته یو. مالومه خبره ده، چې مرستو ته اړتیا لرو.»
په خوست کې د ملګرو ملتونو د کډوالو ادارې یا یونسیار استازی ایوب اندیال وايي، له شپږ سوه کورنیو سره د سرپناه ترمیم په موخه ۴۰۰ ډالر او ۱۰۰ کورنیو ته د تشنابونو جوړولو لپاره ۲۰۰ ډالر ورکړي او په خبره یې له دې سره به پنډغالي کې د سرپناه نه موجودیت ستونزه هواره شي.
اندیال زیاته کړه:« له ۶۰۰ کورنیو سره د کورونو د ترمیم لپاره ۴۰۰ ډالر او ۱۰۰ کورنیو سره د تشنابونو جوړولو لپاره ۲۰۰ ډالر مرسته وشوه، چې په دې سره به پنډغالي کې تر ډېره د سرپناه ستونزه هواره شي.»
خو کډوال وایي، مرسته له محدودو کورنیو سره شوې، چې بسنه نه کوي او سلګونه کورنۍ، چې سرپناه نه لري، ترې بې برخې پاتې دي.
ګلان پنډغالي کې مېشت کډوال عبدالله وايي:« یوازې دلته شااوخوا ۴۹۰۰ کورنۍ ژوند کوي. زموږ غوښتنه دا ده، چې دغه ټولې کورنۍ اړتیا لري، چې باید یادې مرستې ورته ورسېږي، ډېری داسې کورنۍ شته، چې لا څه نه دي ورکړل شوي.»
د مالوماتو له مخې، ګلان پنډغالي او یو شمېر نورو سیمو کې ۷۰۰۰ کورنۍ ژوند کوي او دغه کورنې ۲۰۱۴ کال کې وزیرستان کې د پاکستاني پوځ د عملیاتو له کبله خوست ته را کډه شوي دي.
