که څه هم په افغانستان د اسلامي امارت بیا ځلې واکمنېدو سره د یو شمېر هېوادونو استازو د سرپرست حکومت چارواکو سره د اړیکو پیاوړتیا په موخه لیده کاته کړي، خو د سرپرست حکومت رسمیت پېژندلو په تړاو یې لاهم خپل دریځونه نه دي روښانه کړي.
تازه په کابل کې د جاپان سفیر د اسلامي امارت بهرنیو چارو سرپرست مولوي امیرخان متقي سره کتلي دي.
د بهرنیو چارو وزارت مرستیال ویاند ضیا احمد تکل وايي، په دې کتنه کې سرپرست وزیر ويلي، د اقتصاد محوره پالیسۍ له مخې د ټولې نړۍ له هېوادونو سره اړیکو پاللو ته لېواله دي.
تکل زیاتوي:« له سيمې او نړۍ سره مو تعاملات ښه لور ته روان دي او سرپرست حکومت د خپل متوازن، نورو ته د ضرر نه رسولو او اقتصاد محوره پالیسي له مخې له ټولو جهتونو سره اړیکو ته لېواله دی.»
بل لورته د چاپان سفیر په دې ناسته کې بیا له افغانستان سره د اړیکو پراختیا سربېره ډاډ ښودلی او ويلي یې دي چې هېواد يې د نشه یي توکو پر وړاندې د مبارزې په برخه کې همکارۍ ته ژمن دی.
د بهرنیو چارو وزارت مرستیال ویاند په دې اړه وايي: « د جاپان سفیر د نشه يي توکو د کښت او تولید پر ضد د قوي مبارزې ستاینه وکړه او د بدیل کښت په اړه یې د جاپان د همکاریو ډاډ ورکړ.»
د سیاسي چارو شنونکي له هېوادونو سره دغه ډول لیدنې ګټورې بولي او د نړۍ له نورو هېوادونو غواړي چې د افغانستان له سرپرست حکومت سره تعامل لاغښتلی کړي.
د سیاسي چارو شنونکی معین ګل څمکنی وايي: « دا ډول لیدنې د تعاملاتو په اړه ډېرې اغېزناکې واقع کېدای شي. څومره چې موږ اړتیا لرو، نور هېوادونه هم اړتیا لري؛ ځکه اوس افغانستان کې سوله او امنیت شته او حکومت په ښه شان اداره کېږي. ښه دا ده چې ټول هېوادونه د تعامل لاره خپله کړي.»
د سیاسي چارو شنونکی توریالی ځاځی وايي:« جاپان تل له افغانستان سره مرستې کړې او د نورو مرستو ژمنه یې کړې. د نړۍ هېوادونه اوس دې ته په خپله هڅول شوي چې له افغانستان سره تعامل وکړي او له طالبانو سره ډېپلوماټیکې اړیکې ټینګې کړي.»
ځینې نور بیا د جاپان اقتصادي پرمختګ ته په پام له دې هېواد سره سوداګريزي اړيکې مهمې يادوي او د پیاوړتيا پر لارو چارو يې ټینګار کوي.
د اقتصادي چارو شنونکی ډاکټر عبدالصادق حمیدزوی وايي:« له جاپان سره چې هر څومره ښې او پياوړې اړیکې ټینګې شي، دا کولی شي د افغانستان تخنیکونه پياوړي کړي. د افغانستان د ډېپلوماسۍ لمنه پراخول له بل هر وخت ډېر د اوسني وضعیت تقاضا ده.»
دا په داسې حال کې ده چې تېره اوونۍ د افغان سولې لپاره د امریکا پخوانی ځانګړی استازی زلمی خلیلزاد او مل پلاوی کابل ته راغلي وو چې د اسلامي امارت له یو شمېر چارواکو سره یې پر ځینو مسایلو خبرې وکړې، خو د خلیلزاد راتګ سره انګېرنې دا دي چې د سیمې او نړۍ هېوادونه لېواله شوي چې له افغانستان سره اړیکې لا پراخې کړي.
