له نړیوالو د اسلامي امارت رهبر غوښتنه؛ د افغانستان په کورنیو چارو له لاسوهنې ډډه وکړئ
د اسلامي امارت رهبر شیخ هبةالله اخندازه د کوچني اختر په مناسبت د مبارکۍ پيغام کې له هېوادونو او اسلامي نړۍ سره د افغانستان په اړیکو او دغه راز د هېواد په کورنیو چارو کې د نورو په نه لاسوهنې ټینګار کړی دی.
دغه اختریز پيغام چې د ارګ لخوا خپور شوی، له نړیوالو غوښتل شوي چې د افغانستان په کورنیو چارو کې دې لاسوهنه نه کوي.
د اختریز پیغام یوه برخه:« اسلامي امارت غواړي له اسلامي نړۍ سره د اسلامي اخوت پر اساس ټینګې او ښې اړیکې ولري. همدا راز غواړي له نورو هېوادونو سره په اسلامي اصولو ولاړې ښې او ګټورې اړیکې ولري.»
د اسلامي امارت رهبر په دغه پیغام کې له نړیوالو غوښتي چې د افغانانو ارزښتونو ته درناوی وکړي.
د اختریز پیغام یوه برخه:«له ټولو خواوو غواړو چې د افغانستان د خلکو معتقداتو او ارزښتونو ته درناوی وکړي، زموږ په کورنیو چارو کې مداخله ونه کړي او زموږ د ثبات، امنیت او پرمختګ مانع ونه ګرځي.»
د سیاسي چارو شنونکي بیا د اسلاميامارت د رهبر اختریز پيغام کې له اسلامي نړۍ سره د اړیکو ښه کېدو ته په اشارې وايي، افغانستان د نړیوالې ټولنې یوه برخه ده او افغانستان او نړیواله ټولنه دې د تعامل لپاره ګډې هڅې وکړي.
د سیاسي چارو شنونکی معین ګل څمکنی وايي:« دا چې امیرالمومنین په خپل اختریز پيغام کې ویلي چې له ټولو هېوادونو سره د اسلامي اصولو پر بنسټ خپلې اړیکې ټينګوو، دا ښه ده ځکه چې موږ خپل ارزښتونه لرو. دغه راز په پیغام کې ځینو ټکو ته اشاره شوې چې خپل اتحاد وساتو او د دې لپاره باید هڅه وشي. لویې جرګې راوغوښتل شي ترڅو د افغانانو یووالي ته په کې کار وشي.»
د سیاسي چارو شنونکی خلیل احمد نادم وايي:« ښه به دا وه چې د افغانستان اسلامي امارت رهبر داسې یو فرمان صادر کړی وی چې ښوونځي دې د نجونو پرمخ خلاص شي، پوهنتونونه دې خلاص شي، ښځو ته د کار حق ورکړل شي. دا به یو ښه ګام و، د افغان ولس لپاره به یو ښه زیری و او هم به د نړۍ لپاره.»
که څه هم واک ته د سرپرست حکومت د رسېدو نږدې څلور کاله پوره کیږي، خو لاهم د نړۍ هیڅ هېواد د اسلامي امارت پر رسمیت نه دی پیژندلی.
