د پښتون ژغورنې غورځنګ مشر منظور احمد پښتين په خپلو تازه څرګندونو کې پر پاکستان توندې نیوکې کړي او وايي، د پاکستان ریاست د پښتنو پر وړاندې په روان ظلم چوپ پاتې دی.
پښتين زياتوي، د پاکستان له لوري روان ظلم د پښتنو له زغم وتلی او له همدې امله غواړي چې د پښتنو په اړه د پاکستان پر تشدد ولاړو پالیسيو پر وړاندې لوی پاڅون وکړي.
پښتين زیاتوي:« په پښتون مېشتو سیمو کې هره ورځ پر پښتنو په پراخه توګه ظلمونه کېږي، خو د پاکستان ایالتي او مرکزي حکومتونه یې پر وړاندې غلي دي. د پاکستان حکومت د ظالمانه سیاستونو پر وړاندې د یوه اغېزمن او منظم ولسي پاڅون لپاره له سیمه ییزو او د نورو مظلومو قومونو له مشرانو سره په اړیکه کې يو.»
دا په داسې حال کې ده چې د پاکستان پوځ تازه د پښتون ژغورنې غورځنګ د یوه غړي نیاز احمد پر دوو زامنو برید شوی چې یو یې وژل شوی او بل یې سخت ژوبل دی.
د سیاسي چارو کارپوهان وايي، د پاکستاني پوځ له لوري پر پښتنو او بلوڅانو ظلم او جبر خپل اوج ته رسیدلی، مشران یې وژل شوي، طبيعي زیرمې یې غصب، سیمې یې ناامنه او همدا راز زده کړې او کلتور یې زيانمن شوي دي.
د سیاسي چارو شنونکی کمال ناصر اصولي وايي: « په پښتنو او بلوڅانو ظلم اوج ته رسېدلی، له دوی یې کلتور او فرهنګ اخیستی، له دوی یې امن او سوکالي اخیستي، له دوی یې زده کړې اخیستې، له دوی یې د دوی په سیمو کې شته قېمتي زېرمې لوټ کړې دي. مشران یې اختطاف او وژل کېږي، ظلم او زیاتی خپل لوړ حد ته رسېدلی. په نورو قومونو باندې ظلم او زیاتی د دوی په پالیسۍ کې دی.»
ځينې نور بیا په دې باور دي چې پاکستان د تاریخ په اوږدو کې د پښتنو او بلوڅانو سربېره له هغو قومونو سره چې د خپلو حقونو ترلاسه کولو لپاره مبارزه کوي، د بشري حقونو ضد کړنې ترسره کړې دي.
دوی وايي، هغه پښتانه او بلوڅ مبارزين چې د خپلو حقوقو لپاره غږ پورته کړي، د پاکستان له لوري یې خوله ورپټه شي.
د پوهنتون استاد فیض محمد ځلاند په دې اړه وايي: « پاکستان نه یوازې په دې وروستیو کې، بلکې د تاریخ په اوږدو کې تل له پښتنو او بلوڅو او هغو ټولو وګړو سره د بشر ضد، کرغېړنه او شومه معامله کړې چې د پاکستان په داخل کې د خپلو حقونو لپاره مبارزه کوي. موږ ګورو چې په پاکستان کې سلګونه زره پښتانه او بلوڅ ځوانان، روڼ اندي، متفکرین، علما، پوهان او نور کسان ورک دي؛ پرته له محکمې له خپلو کورونو، بازارونو، لارو او کوڅو، ښوونځیو او پوهنځیو پورته شوي او لا درکه دي.»
له بلې خوا، د ماهرنګ بلوڅ د نیول کېدو په غبرګون کې د بلوچستان بېلا بېلو سیمو کې اته لاریونونه راوتلي.
دا په داسې حال کې ده چې د پاکستان پولیسو ادعا کړې چې ماهرنګ بلوڅ یې د بغاوت او ترهګرۍ په تور نیولې، خو د بشري حقونو او بښنې نړیوال سازمانونه وايي، ماهرنګ د سوله ییز لاریون پرمهال نیول شوې او باید ژر تر ژره خوشې شي.
