د افغانستان لپاره د پاکستان ځانګړي استازي محمد صادق خان له سفر وروسته، د دې هېواد مرستیال لومړي وزیر له نوموړي سره کابل ته د درې ورځني رسمي سفر پر پایلو او لاسته راوړنو خبرې کړې.
د پاکستان ډان ورځپاڼې د راپور له مخې، د اسحاق ډار او صادق خان ترمنځ په دې ځانګړې ناسته کې د افغان او پاکستاني چارواکو ترمنځ خبرې اترې او ډیالوګ د دوه اړخیزو اړیکو د پراختیا ترڅنګ د دې هېواد اندېښتو ته د رسېدا لپاره مهم بلل شوي.
د پاکستان بهرنیو چارو وزارت په یوه اعلامیه کې ویلي: « مرستیال لومړي وزیر د پاکستان اندېښنو ته د رسېدو او د دوه اړخیزو اړیکو د پراختیا په موخه له افغانستان سره د دوامداره خبرو اترو پر اړتیا ټینګار وکړ.»
په پاکستان کې د وسله والو ډلو حضور او فعالیت، د ډیورنډ فرضي کرښې په اوږدو کې پوځي نښتې او سوداګریزه راکړه ورکړه په اوسنیو شرایطو کې د دواړو هېوادونو ترمنځ اساسي ننګونې بلل کېږي.
اسلامي امارت له وړاندې د وسله والو ډلو د فعالیت اړوند مسایل د پاکستان کورنۍ موضوع بللې او د سرپرست حکومت دغه دریځ ته په کتو، د پاکستاني چارواکو له لوري پر یادې مسالې د خبرو اترو غوښتنه هم بې مانا او بې ګټې ښکاري.
د سیاسي چارو شنونکی شهسوار سنګروال وايي: « دا چې په دې وروستیو کې د لومړي وزیر مرستیال کومه اندېښنه ښودلې چې موږ باید له افغانستان سره خبرې وکړو، د دې خبرو موخه د ټي.ټي.پي مساله ده او دوی غواړي چې نړۍ ته وښيي چې ټي.ټي.پي په افغانستان کې ده او دوی په دې اړه د افغانستان له واکمنو سره وکړې. زما په اند، طالبانو او د اسلامي امارت چارواکو ته په کار ده چې دا ډول خبرو ته په هېڅ ډول حاضر نه شي؛ خو که چېرې عمومي توګه په سیاسي، تجارتي او نورو مسایلو خبرې کوي، دا یو معمول کار دی او څه خبره نه ده.»
له دې ټولو سره، د ډیورنډ فرضي کرښې په اوږدو کې وخت نا وخت نښتې او له پاکستان سره سوداګریزې ناندرۍ هغه دوه ستونزې دي چې هوارېدل یې د وسله وال تقابل پر ځای د خبرو اترو له لارې دواړو خواوو ته بې ګټې نه دي.
که څه هم د سیاسي چارو شنونکي تېر ته په کتو په دې اړه د پاکستاني چارواکو پر ارادې شک لري، خو بیا هم پر ګډو موضوعاتو ډیالوګ او خبرې اترې د هېوادونو ترمنځ د نظم راتلو لپاره د نړیوال اصل په توګه یادوي.
د سیاسي چارو شنونکی ادریس محمدي ځاځی وايي:« د پاکستان له خوا دغه شان غوښتنې او ادعاوې په دې موخه کېږي چې نړۍ ته وښيي چې ګویا د افغانستان اسلامي امارت له ټي.ټي.پي سره اړیکې او نفوذ لري او د دوی خبرې پر هغوی اغېز لري. د اسلامي امارت مشرانو او ویاندویانو څو ځله دا خبره رد کړې ده.»
سرپرست حکومت تر اوسه د دې لوړپوړي پاکستاني چارواکي د وړاندیز په اړه څه نه دي ویلي، خو له دې وړاندې يې له ګاونډ، سیمې او نړۍ سره تعامل او د خبرو اترو له لارې د کشالو او ستونزو حل د سرپرست حکومت د بهرنۍ پالیسۍ اساسي برخه ګڼلې ده.
د افغانستان لپاره د پاکستان ځانګړي استازي محمد صادق خان د روانې مارچ میاشتې په ۲۲مه افغانستان ته په خپل رسمي دویم سفر کې د بهرنیو چارو وزارت له سرپرست سربېره د صنعت او سوداګرۍ وزارت له سرپرست نور الدین عزیزي سره هم لیدلي او دواړو خواوو د را روانې اپرېل میاشتې له ۱۵مې نېټې وړاندې د ګډې همکارۍ د یوې کمېټې ترمنځ پر لیدنې هم هوکړه کړې.
