په داسې حال کې چې د پاکستان له لوري افغان کډوالو ته له دې هېواد او خيبرپښتونخوا د وتلو لپاره ورکړل شوي وخت ته يوازې څو ورځې پاتې دي، هلته مېشت افغان کډوالو، کاروباريان او پانګوال دغه مهلت ډېر لنډ بولي.
دوی وايي، په پاکستان او خيبرپښتونخوا کې يې له لسيزو راهيسې د ميليونونه ډالرو په ارزښت پانګونې کړې او نه شي کولی خپل ټول کاروبار او حسابونه په يوه مياشت کې راټول کړي.
په خیبرپښتونخوا کې کاروبار لرونکی سلطان عزیز وايي: « حکومت چې د مارچ تر ۳۱ مې موږ ته کوم وخت راکړی، دا ډېر کم وخت دی او باید موږ ته لا ډېر وخت راکړي؛ ځکه دلته زموږ کاروبار او خلکو سره مو پیسې دي. د حساب کتاب راټولولو لپاره باید موږ ته نور وخت هم راکړل شي.»
په پاکستان کې مېشت ځيني نور افغان پانګوال هم غوښتنه کوي چې د پاکستان حکومت له لوري ورکړل شوی مهلت دې وغځول شي او په خبره يې، د افغانستان سرپرست حکومت دې هم د دوی ستونزې له پاکستان سره د خبرو له لارې هوارې کړي.
په پاکستان کې مېشت افغان ملک مجاهد شینواری وايي:« نو په دې خاطر د اسلامي امارت له حکومت غوښتنه کوو، که هرڅومره ستونزې وي، پاکستان زموږ ګاونډی هېواد دی او راشئ د پاکستان له ملکي او نظامي حکومت سره خبرې وکړئ، ترڅو د ضرب الاجل نېټه اوږده شي یا ختم شي.»
عمران شینواری وايي: « له اسلامي امارت غوښتنه کوو چې د پاکستان له حکومت سره خبرې وکړي او د افغان کډوالو لپاره نور وخت وغواړي، ترڅو موږ په عزت خپل هېواد ته ستانه شو.»
د افغان کډوالو د ايستلو دا پرېکړه په پښتونخوا او پاکستان کې هم په ولسي کچه له پراخ غبرګون سره مخ شوې ده.
د دې هېواد د پارلمان پر غړیو سربېره د ځینو ملت پاله ګوندونو له لوري هم له پاکستانه د دې پرېکړې د بېرته اخیستلو غوښتنه شوې.
د عوامي ملي ګوند د عالمانو کمېټې غړی مولانا خانزېب وايي: « موږ د دې پرېکړې غندنه کوو او ترڅنګ یې غوښتنه لرو چې د پاکستان او افغانستان ترمنځ شته مسایل او ستونزې په ریاستي او سفارتي بڼه د خبرو اترو له لارې حل شي. د یو اړخیزې پرېکړې اعلانول او په داسې بڼه د افغانانو ایستل، د ولسونو او هېوادونو ترمنځ کرکه او ستونزې پیدا کوي.»
خو سرپرست حکومت د پاکستان په ګډون له ګاونډيو هېوادونو غواړي چې افغان کډوال دې پر زور له خپلې خاورې نه باسي.
د حکومت وياند په پاکستان کې افغانانو ته د لنډمهالي مهلت ورکول د اصولو خلاف ګڼي او زياتوي چې افغانان دې په خپله خوښه ستنېدو ته پرېږدي.
د اسلامي امارت د وياند مرستیال حمدالله فطرت وايي:« اسلامي امارت پر هغو ټولو هېوادونو چې افغانان په کې مېشت دي، غږ کړی چې په جبري توګه د افغانانو د راستنولو مخه ونیسي. د افغانانو د جبري ستنولو لپاره د مارچ ۳۱ مې په شان پرېکړه ناسمې پرېکړې دي او د افغانانو پر حق باندې تېری دی. همدارنګه د نړیوالو او مهاجرت د اصولو له مخې هم دوی نه شي کولی یو څوک په جبر او ناڅاپي توګه له خپل هېواده وباسي.»
تازه په تازه د خيبرپښتونخوا اعلی وزير علي امين ګنډاپور چې وړاندې يې د افغان کډوالو د ايستلو په اړه د پاکستان د مرکزي حکومت د پرېکړې مخالفت کړی و، په ناڅاپي توګه د دريځ په بدلولو سره دا پرېکړه پرځای بللې او ويلي يې دي چې د مارچ تر وروستيو د مهلت له پوره کېدو سره به له خيبرپښتونخوا هم افغان کډوال په زور وباسي.
