طالبانو سره سوله باید له ولسمشریزو ټاکنو مخکې شي.
د افغانستان لپاره د امریکا ځانګړی استازی زلمی خلیلزاد وايي د پخلاینې بهیر تر ټاکنو مهم دی ځکه که سوله وشي طالبان هم باید سیاسي بهیر کې برخه واخلي.
خلیلزاد وايي د سولې لپاره په ډېره بیړه کې دي ځکه افغانان نور له جګړې ستړي دي.
خلیلزاد د سولې او پخلاینې په تازه بهیر کې یو ځل بیا د ګاونډيو هیوادونو په ځانګړې توګه د پاکستان رول اړین وباله.
د افغان سولې لپاره د امریکا ځانګړي استازي زلمي خلیلزاد چې د افغان سولې په تړاو تازه هلې ځلې پېل کړي سوله تر هرڅه اړینه بولي.خلیلزاد له پي بي اس تلویزیون سره په مرکه کې د سولې بهیر له ټاکنو اړین وباله.
هغه وايي پخلاینه باید له افغان ولسمشریزو ټاکنو مخکې وشي چې طالبان له پخلا کیدو وروسته په سیاسي بهیر کې برخه واخلي.
د افغان سولې لپاره د امریکا ځانګړي استازي زلمي خلیلزاد داسې ویلي (( که له طالبانو سره لومړی د سولې تړون لاسلیک شي او بیا ولسمشریزې ټاکنې وشي دا به غوره وي، ځکه بیا طالبان به هم وکړای شي په دې بهیر کې ګډون وکړي خو که کوم تړون ونشو بیا به احتمالي ټاکنې پخپل وخت کیږي.))
خلیلزاد وايي امریکا او افغان حکومت ځکه د سولې لپاره ډېره بیړه کوي چې افغانان له جګړو ستړي دي او دا تراژیدي باید ژر پای ته ورسېږي.
زلمي خلیلزاد ویلي (( هو ، موږ په بیړه کې یو چې دا افغان تراژیدي پای ته ورسېږي ځکه افغانان له جګړې ستړي دي. افغانان سولې ته تر هر څه ډېره اړتیا لري ځکه څلوېښت کاله کېږي چې هلته جګړه روانه ده. موږ په بیړه کې یو خو موږ رېښتینې پایلې غواړو.))
پاکستان چې په افغان جګړه کې تل ملامته ګڼل شوی او د دې جګړې اصلي طرح کوونکي له کرښې ها غاړه ګڼل کيږي، په دې سوله کې مهم رول لوبولای شي.
خلیلزاد هم د تېر په څېر پاکستان مسوول وباله او له هغوی یې وغوښتل چې افغان سوله کې رغنده رول ادا کړي.
د افغان سولې لپاره د امریکا ځانګړي استازي زلمي خلیلزاد داسې ویلي (( موږ په داسې حال کې چې د سولې لپاره بین الافغاني مذاکرات غواړو له ګاونډیو سره هم د دې مذاکراتو غوښتونکي یو. زه فکر کوم چې اوس یې وخت را رسېدلی چې افغانستان کې سوله راشي او پاکستان پکې مثبت رول ولوبوي.))
د افغان سولې لپاره د امریکا دغه ځانګړی استازي هم بین الافغاني خبرې اترې اړینې وبللې او زیاته یې کړه چې تر هغې دا جګړه پای ته نه رسیږي چې افغانان یو بل و نه مني او ټول د مذاکراتو په یوه میز را ټول نشي.
