د کابل او سلاماباد له لوري پر يوه بل د وسلهوالو تملويل او ملاتړ تورونو پایله کې د اړيکو له خړ پړېدو وروسته، د افغانستان لپاره د پاکستان ځانګړی استازی محمد صادق خان کابل ته راغلی.
د اسلامي امارت ویاند وايي له نوموړي سره به پر لوړه کچه پر هغو مهمو مسايلو خبرې وشي، چې وړاندې پېښ او يا هم په راتلونکي کې يې د پېښېدو اټکل دی.
ذبیح الله مجاهد که څه هم د يادو مسايلو په اړه بشپړ وضاحت نه دی ورکړی، خو د تورخم لارې تړل کېدل، د سوداګرو ستونزې، د کډوالو ځورول او ځيني نور هغه د افغانستان له ادرسه مطرح کېدونکي موضوعات بللي.
مجاهد زیاتوي:« د افغانستان او پاکستان ترمنځ ځینې موضوعات چې پېښېدونکي دي، یا پېښ شوې دي، پر هغو باندې به خبرې کوي. د دروازو تړلو موضوع ده، د ډیورنډ کرښې په اوږدو کې ځینې ستونزې کله کله پېښيږي، د افغان تجارانو لپاره ځينې ستونزې، افغان مهاجرینو لپاره ستونزې پېښیږي، د دې ټولو موضوعاتو په اړه به بحث وشي.»
د بهرنیو چارو وزارت سرپرست مولوي امیر خان متقي سره د پاکستان ځانګړي استازي د افغانستان او پاکستان پر دوو اړخیزو اړیکو، سیاسي او اقتصادي همکاریو، ټرانزېټ او د ولسونو تر منځ پر تګ راتګ خبرې شوې.
متقي په ټرانزیټي لارو او تجارتي برخو کې خنډونه د هېڅ لوري پر ګټه نه ګڼي.
د بهرنیو چارو وزارت مرستیال ویاند احمد ضیاد تکل په دې اړه وايي:« د هېواد بهرنیو چارو وزیر پاکستاني لوري ته یاده کړه چې پر ټرانزیټي لارو او تجارتي برخو کې خنډونه د هېڅ لوري پر ګټه نه دي او ټینګار یې وکړ چې پکار ده دا مسایل له یو بل سره ونه تړل شي. همدا راز د بهرنیو چارو وزیر یادونه وکړه چې پاکستان کې مېشت افغان مهاجرین باید د جبري ایستلو پر ځای په تدریج سره او ابرومندانه بڼه خپل هېواد ته راستانه شي.»
د تکل په خبره، د پاکستان ځانګړي استازي په افغانستان کې امنیت د پاکستان او سیمې پر ګټه بللی او افغانانو ته يې د وېزو ورکړې او پاکستان ته يې د تګ راتګ په برخه کې د اسانتیاوو رامنځته کولو ژمنه کړې.
تکل زیاته کړې:« همدا راز په ناسته کې د پاکستان ځانګړي استازي افغانستان کې امنیت د پاکستان او سیمې پر ګټه وباله او ژمنه یې وکړه چې افغانانو ته د وېزو ورکړې او پاکستان ته د تګ راتګ په برخه کې د اسانتیاوو رامنځته کولو په برخه کې به اړین اقدامات کوي او ه م به د تجارت او ټرانزیټ په برخو کې د شته ستونزو د حل پر لوري عملي ګامونه پورته کړی شي.»
د سیاسي چارو شنونکي بيا کابل ته د محمد صادق خان د سفر په اړه بېلابېل نظرونه لري.
يو شمېر يې دا سفر په قبايلي سيمو او خيبرپښتونخوا کې د روانو ناامنيو د کابو کولو په موخه د کابل د همکاريو جلبولو هڅه بولي.
د سیاسي چارو شنونکی ادریس محمدي ځاځی وايي:« د دغه شان چارواکو راتګ افغانستان ته په هغه معیار او ډول نه وه د څه لپاره چې دوی نیت کړی و او افغانستان ته راغلي وو.»
ځينې نور بیا لاهم د افغانستان پر وړاندې د پاکستان سیاسیتونو ته د شک په سترګه ګوري او وایي، کابل او اسلاماباد دې د اړیکو پیاوړتیا لپاره د باور فضا جوړه کړي.
د نړیوالو اړیکو کارکارپوه سیمر انګار وايي:« د کابل او اسلام ا باد ترمنځ د اړیکو ښه والي لپاره باید باور جوړونه، اقتصادي همکاري او ډېپلوماټیک تعامل مهم دي.»
شاوخوا څلور میاشتې وړاندې هم د افغانستان لپاره د پاکستان ځانګړی استازی محمد صادق خان کابل ته راغلی و او هغه مهال یې د کورنيو چارو وزارت له سرپرست خلیفه سراجالدين حقاني او د بهرنيو چارو وزارت له سرپرست مولوي امير خان متقي سره د افغانستان او پاکستان تر منځ د ستونزو پر حل او د اړیکو پر ښه والي غږېدلی و.
