افغان سولې لپاره د امریکا پخوانی ځانګړی استازی زلمی خلیل زاد وايي پاکستان دې د بشرحقونو له پراخو سرغړونو لاس واخلي او دغې مسالې ته دې د پای ټکی کیږدي.
خلیلزاد پر خپله اېکس پاڼه لیکلي، اسلام اباد باید په دغه هېواد کې د بشري حقونو سرغړونو روانه لړۍ ودروي او په خبره یې د پاکستان ولس هم د ښه ژوند کولو حق لري.
هغه زیاته کړې:« په پاکستان کې د بشري حقونو “پراخ نقض” باید پای ومومي. عمران خان باید را خوشې شي؛ ځکه چې د پاکستان ولس د ښه وضعیت او ژوند مستحق دی.»
د سیاسي چارو کارپوهان بیا وايي، پاکستان له لسیزو راهیسې له هغو وګړو سره چې د خپل حق غوښتنه یې کړې د بشري حقونو ضد چلن کوي.
دوی زیاتوي، پښتانه او بلوڅ چې د خپل حق غوښتونکي دي زرګونه تنه یې د پاکستان حکومت له لوري نیول شوې او لاهم لادرکه دي.
د دوی په خبره، که پاکستان د بشري حقونو نقض بند نه کړي نو په دغه هېواد کې به ناامني نوره هم زیاته شي.
د پوهنتون استاد فیض محمد ځلاند واي:« پاکستان نه یوازې په دې وروستیو کې بلکې د تاریخ په اوږدو کې تل له پښتنو او بلوڅو او ټولو هغو وګړو سره چې د خپلو حقونو لپاره په داخل د پاکستان کې مبارزه کوي، ناوړه د بشر ضد او کرغېړنه شومه معامله کړې. موږ ګورو په پاکستان کې زرګونه پښتانه او بلوڅ ځوانان، روڼ اندي، متفکرین ، علما، پوهان هغوی ورک دي. که چېرې پاکستان د بشر حقونو ملاتړ په برخه کې خپله پالیسي بدله نه کړي، د بشر حقونو درناوی ونه کړي، ماته ښکاري دا به د پاکستان لپاره په کوردننه لا زیاتې ټولنیزې، امنیتي، اقتصادي او سیاسي ستونزې رامنځته کړي.»
په ورته مهال د بښنې نړیوال سازمان هم اندیښنه ښودلې چې پاکستان کې د بلوڅانو غیر قانوني نیول له بشري حقونو سر غړونه ده.
خو د سیاسي چارو کارپوهان وايي، د بشر حقونو مساله یوازې شعار دی ، که ریښتیا هم نړیوال د بشرحقونو ناقضینو پروړاندې جدي وی نو پاکستان به هېڅ کله هم ترې د بشري حقونو دنقض جرات نه درلوده.
د سیاسي چارو کارپوه توریالی ځاځی وايي:« دا په خپله د پاکستان ایجادول دې سیمه کې او زموږ په ګاونډیتوب کې د انګریزانو او امریکایانو لخوا ستر ناروا بشري جنایت وه چې ترسره یې کړ. ټوله نړۍ ښه پر سترګو ګوري چې پاکستان په دې څو لسیزو کې څه ناروا بشري جنایتونه زموږ په هېواد کې او زموږ ولس پر وړاندې ترسره کړي. یو شی ښه باید صحي په یاد وساتئ چې د بشر حقوق اصلا شتون نه لري. که شتون یې درلودلی، پاکستان به دا جنایتونه ترسره کړی وی؟ نه. »
تازه مواردو کې پاکستاني حکومت په کوټه او بلوچستان کې د بلوڅو پر لاریون ډزې کړې چې په پایله کې یې درې تنه لاریون کوونکي وژل شوي او ۷ نور ټپیان دي، خو لاریون کوونکو د وژل شویو کسانو جسدونه لویې لار ته راویستلي او اعتراض یې روان دی خو د پاکستان ادارو له لوري پرې انټرنېټ بند شوی.
په ورته مهال د بلوڅو دغورځنګ مشرې ماه رنګ بلوڅ ویلي، ګڼ شمیر معترضې ښځې د پاکستاني پولیسو له لوري نیول شوې او لسګونه نور معترضین یې لادرکه دي.
