په هېوادونو کې د سفارتونو د پرانیستلو پر دوام تازه د بهرنیو چارو وزارت په ناروې کې د افغانستان سفارت او کونسلي چارو د بېرته پیل خبر ورکړی.
د اسلامي امارت بهرنیو چارو وزارت له لوري په دې اړه خپره شوې خبرپاڼه کې په ناروې هېواد کې مېشتو افغانانو ته خبر ورکړل شوی چې په اوسلو کې د افغانستان سفارت د روانې مارچ میاشتې پر ۲۴مه خپل کونسلي خدمتونه بيا پیلوي.
خبرپاڼه کې ویل شوې چې د نجيبالله شېرخان په نوم يو ډيپلوماټ په اوسلو کې د افغانستان سفارت د لومړي سکرتر په توګه معرفي شوی.
د خبرپاڼې یوه برخه:« ناروې کې مېشتو درنو هېوادوالو او نورو مراجعينو ته خبر ورکول کېږي چې په اوسلو کې د افغانستان سفارت د ۱۴۰۴ش کال د وري له څلورمې نېټې چې د ۲۰۲۵ز کال د مارچ له ۲۴مې سره سمون لري، کونسلي خدمتونه بيا پيلوي. د افغانستان اسلامي امارت د بهرنیو چارو وزارت ناروې کې د کونسلي خدمتونو بیا پيل یو مثبت ګام بولي.»
موده وړاندې په ناروې کې د افغانستان سفارت چارې د تېر جمهوري نظام له لوري د لېږل شويو ډېپلوماټانو له لوري مخته وړل کېدې، خو یاد سفارت تېر کال د سپټمبر پر ۱۲مه خپل فعالیتونه ودرول.
په دې خبرپاڼه کې دغه راز راغلي و چې یاد سفارت د استازولۍ جایداد او په کې ټول لېږدېدونکي او غیر لېږدونکي توکي د ناروې بهرنیو چارو وزارت ته د امانت په توګه سپاري.
د سیاسي چارو شنونکی خلیل احمد نادم وايي:« دا د طالبانو حکومت لپاره یو پرستیج دی چې دوی د تعامل لاره له نړۍ سره خلاصوي، بل دا چې موږ او تاسو افغانان لرو چې په ټولو هېوادونو کې ژوند کوي په ځانګړې توګه ناروې کې چې کونسلي خدماتو ته ډېره اړتیا لري. د دې لپاره هم ډېر ښه ده چې سفارت فعالیت پیل کړي.»
ځینې نور بیا په اوسنیو شرایطو کې چې سرپرست حکومت له نړۍ سره تعامل ته جدي اړتیا لري، د ناروې په ګډون له هر بل هېواد سره د اړیکو ټینګښت مهم ګڼي.
دوی زیاتوي، سرپرست حکومت ته هم پکار ده چې د دې اړیکو د پراختيا په موخه باید د نړۍوالې ټولنې هغه مشروع غوښتنې ومني چې له نړۍوالو قوانینو او اسلامي ارزښتونو سره په ټکر کې نه وي.
واک ته د اسلامي امارت له رسېدلو سره سم په ټولو هغو هېوادونو کې چې افغانستان ورسره مخامخ ډېپلوماټیکې اړیکې درلودې سفارتي چارې د تېر نظام د ډېپلوماټانو له لوري پرمخ وړل کېدې چې د وخت په تېرېدو سره په ځینو هغو کې دغه چارې سرپرست حکومت ته وسپارل شوې.
د اسلامي امارت د چارواکو په وینا افغانستان دا مهال په بهر کې شاوخوا ۴۰ فعاله سياسي استازولۍ لري چې په کې د سفير او کونسل منل هم شامل دي.
