د افغانستان ملي دفاع سرپرست وزیر ملا یعقوب مجاهد وايي، د هېواد له ځمکنۍ بشپړتیا او دفاع لپاره د یوه داسې ملي پوځ د جوړېدو تکل لري،چې په پوځي روزنه او پرمختللو وسلو او تجهیزاتو به سمبال وي.
مجاهد که څه هم د پوځ شمېر په اړه څه نه وايي،خو زیاتوي،چې عملاً یې کار پيل کړی دی.
مجاهد زیاته کړه:« موږ دا قصد کړی دی،چې د ملي دفاع وزارت په چوکاټ کې یو داسې ملي پوځ جوړ کړو،چې پر لوړ مرال سره د دې خاورې ساتنه وکړي. موږ هڅه کوو،چې د افغانستان د اسلامي امارت ملي پوځ پر پرمختللو وسلو سمبال او مجهز وي،د ځمکنۍ وړتیا ترڅنګ به په هوايي برخه کې هم ځانګړې وړتیا او مهارت ولري. موږ ټولو افغانانو ته ډاډ ورکوو،چې ستاسو ملي پوځ به ستاسو او د هېواد د لوړو ګټو ضامن وي او ملي پوځ به د ولس ریښتینی خدمت ګار وي.»
د اطاعاتو او کلتور وزارت مرستیال ذبیح الله مجاهد وايي، د مسلکي ځواکونو روزنې لپاره ټول امکانات په واک لري او د اردو ترڅنګ ملي پولیس او استخبارات به هم پر خپلو پښو ودروي.
هغه وايي:« د دوی لپاره دلته د تعلیم او تجهیز اکاډمۍ موجودې دي او امکانات شته دی.له دغو ظرفیتونو په استفادې موږ هڅه کوو،چې اردو پر پښو ودریږي، پولیس او استخبارات هم بېرته فعال شي دا درې سره امنیتي اورګانونه د هېواد لپاره حیاتي ارزښت لري. دا له شک پرته به داسې ځواک وي،چې د افغانستان ځمکنۍ بشپړتیا به ساتي، د نظام ټینګه ساتنه به کوي او د خلکو امنیت به ټینګ کړي،اوس یې پرجوړښت کار روان دی، په قولي اردوګانو کې تعینات شوي شوي دي، د پرسونل ارزیابي روانه ده،خو شمیر به یې وروسته مالوم شي.»
د ملي دفاع وزارت سرپرست ملا یعقوب مجاهد وايي، وسله وال پوځ به د هېواد له سرحدونو امنیت ته لومړیتوب ورکوي اوهېڅ هېواد ته به دا اجازه ورنه کړي،چې په سرحدي سیمو کې د افغانستان پر حریم تیری وکړي.
مجاهد زیاتوي:« د افغانستان د اسلامي امارت د ملي دفاع وزارت وسله وال پوځ به د افغانستان د سرحدونو او خاورې ساتنې امنیت ته لومړیتوب ورکوي،هیڅ جهت حق نه لري چې د افغانستان په سرحدي سیمو کې د افغانستان پر حریم تیری وکړي. موږ به چاته د دې کار اجازه ورنه کړو. موږ به د خپلې خاورې له هرې لویشتې داسې دفاع کوو، لکه څنګه چې مو په تېرو شلو کلونو کې د اشغال په مقابل کې ورڅخه دفاع وکړه .»
د سیاسي چارو شنونکي بیا وايي،اسلامي امارت ته په کار ده،چې له تېرو تجربو ګټه واخلي او داسې وسله وال پوځ رامنځ ته کړي،چې له هر ډول قومي لاس وهنو پاک،غیر سیاسي او مسلکي توب په کې لومړیتوب ولري .
شنونکی:« طالبان باید داسې یو ریښیتینې او حقیقي اردو جوړه کړي،چې هغه د قومي ، ژبني او سمتي وڼدو پر اساس نه وي،بلکې هغه د مکلفیت د قانون پر اساس وي، له لکه د پخوا په شان او په کې مسلکي کادرونه ځای ولري.»
اسلامي امارت وايي د ملي پوځ د جوړېدو چارې عملآ پیل شوي او تازه د مزار شریف له قول اردو ۴۰۰ سرتیري له مسلکي پوځي زده کړو وروسته فارغ او په اړوندو برخو کې به پر دندو وګومارل شي.
