د امریکا دفاع وزارت(پېنټاګون) مسوولینو په یوه خبري کنفرانس کې ویلي، په افغانستان کې یې د جګړې دوام له ستونزو ډک و او پایله یې د امریکايي ځواکونو پر زیاتو قربانیو سربېره، بې ګټې وه.
د دوی په خبره، پېنټاګون به له افغانستانه د امریکايي ځواکونو د ایستلو په پروسه کې ښکېل امریکايي چارواکي هم حساب ته را وغواړي.
د پېنټاګون ویاند شان پارنېل ویلي: « زه په دې پوهېږم چې کله هر سهار له خوب پاڅېږم او ساه اخلم، نو زه د هغو خلکو په اړه فکر کوم چې ملګري یې په جګړه کې وژل شوي. زما هم۳۰ ملګري د افغانستان په جګړه کې ووژل شول. موږ او تاسو باید اوس له خپلو ځانونو پوښتنه وکړو چې دا قربانۍ د څه لپاره وې؟ د حکومت ټول چارواکي مسوول دي، که یو سرتېری وسله ورکه کړي له هغه سره حساب کېدلی شی، نو له دې لوړ پوړو چارواکو سره هم باید حساب وشي.»
د پېنټاګون ویاند دغه راز ویلي، د جوبایډن پر مشرۍ د امریکا مخکېنو چارواکو د یوې شفافې تګلارې له تعقیب پرته هغه ژمنتیاوې له پامه وغورځولې چې واشنګټن یې د نړیوالو جګړو په پای ته رسولو کې د اصل په توګه بولي.
پارنېل په دې اړه ویلي: « افغانستان په ډېر ستونزمن حالت کې را ګیر و او دا هغه څه دي چې ولسمشر ټرمپ او دفاع وزیر هېګسټ په ښه توګه پرې پوهېږي او کله چې امریکا کومې پرېکړې کوي چې په یوه جګړه کې ښکېل شي، نو دې ته بیا موږ ډېرې ژمنې لرو، موخې ته رسېدنه، د وتلو روښانه تګلاره او بریالیتوب یې مشخصې برخې دي.»
له دې وړاندې د امریکا ولسمشر ډونالډ ټرمپ هم ټينګار کړی و چې د بایډن ادارې پر مهال له افغانستانه د امریکايي ځواکونو په عجولانه بهر کېدو سره په نړۍ کې د امریکا حیثیت ته لوی زیان رسېدلی.
خو د سیاسي چارو کارپوهان وايي، امریکا او متحدینو یې د ټریلیونونو ډالرو په لګولو سربېره هم په افغانستان کې جګړه پای ته ونه رسوله.
د دوی په خبره، واشنګټن د افغانستان په جګړه کې په سیاسي او امنیتي برخو کې ناکام و.
د سياسي چارو شنونکی ابوالحسن صالحي وايي: « له افغانستانه د امریکايي ځواکونو وتل چې له هره اړخه بررسي کړو که دا اقتصادي اړخ و، که سیاسي او نظامي، د امریکا حیثیت ته یې زیان ورساوه. دوی هغه هدف ته ونه رسېدل چې لپاره یې افغانستان ته راغلي وو. د دې جګړې لګښتونه د امریکا پر اقتصاد بار و، د نشه يي توکو قاچاق ورځ تر بلې په زیاتېدو و او افغانستان کې نا امني ورځ تر بلې ډېرېدله.»
د سياسي چارو شنونکی محمد زلمی افغانیار وايي: « امریکا افغانستان ته د ملت جوړونې لپاره نه وه راغلې بلکې دوی په حکومتوالۍ کې د خپلو سیاسي ګټو د تأمین لپاره راغلي وو. اوس چې دوی په دې اړه پيغام لري چې ولې له افغانستانه ووتل او هغه کسان محاکمه کوي چې د وتلو په پرېکړه کې دخیل وو، دا د دوی خپل کار دی. افغانستان غواړي اقتصادي او سیاسي خپلواکي ولري.»
بله خوا، سرپرست حکومت بیا د ټرمپ وروستیو څرګندونو ته چې په افغانستان کې يې د پاتې شویو امریکايي وسلو په اړه درلودې ویلي، دغه وسلې غنیمت دي او د افغانستان د امنیت او دفاع لپاره به وکارول شي.
