اتصالات مخابراتي شرکت په کابل کې د یوې غونډې پرمهال د کرېکټ ملي لوبډلې لوبډلمشر حشمتالله شهيدي او ملي لوبغاړی ګلبدين نايب د خپلو سوداګريزو سفيرانو په توګه اعلان کړل.
د اتصالات مخابراتي شرکت چارواکي وايي، د ورزش او په ځانګړې توګه د کرېکټ د ودې په برخه کې هر ډول همکاريو ته چمتو دي.
د اتصالات د اړيکو مسوول کفایت الله نبي خېل وايي: « موږ نن ورځ د کرېکټ ډګر دوو ځلانده ستورو حشمت الله شهیدي او ګلبدین نایب ته له اتصالاتو شرکت سره د تجارتي سفیر په توګه رسمي قراردادونه ورکړل. اتصالاتو د ملي لوبډلې هره لوبه تمویل کړې او د ۲۰۲۵ کال لپاره به هم د ملي لوبډلې د تمویل قرارداد ولرو.»
د کرېکټ ملي لوبډلې ځيني لوبغاړي هم د ورزش ودې په برخه کې د اتصالات مخابراتي شرکت هڅې ستايي او په دې برخه کې د ياد شرکت د همکاريو د دوام غوښتنه کوي.
د اتصالات مخابراتي شرکت سوداګريز سفير حشمتالله شهیدي وايي: « ډېر خوښ یم چې یوځل بیا له اتصالات مخابراتي شرکت سره تړون لاسلیک کوم. زه له اتصالات شرکت ډېره مننه کوم چې له لومړۍ ورځې راهیسې د سپورټي ادارو ملاتړ او همکاري کوي.»
دوی دغه راز له نورو سوداګرو هم غواړي چې د بهر پر ځای په کور دننه له پانګونې سره نورو ځوانانو ته هم د کار کولو فرصت برابر کړي او په دې توګه په هېواد کې د بېروزګارۍ مخه ونيسي.
د اتصالات مخابراتي شرکت سوداګريز سفير ګلبدین نایب وايي: « دا له اتصالاتو سره زما لومړنی سفر دی او هڅه به وکړم چې خپل هېواد ته ویاړونه راوړم. زه په افغانستان کې د اتصالات له مشرتابه مننه کوم او خوښ یم چې په دې سفر کې له اتصالاتو سره یم. همدارنګه زه په ټولو سوداګرو غږ کوم چې راشي او افغانستان کې پانګونه وکړي.»
په دې وروستيو کې د کرېکټ په شمول په ټولو برخو کې له ورزش د خلکو ملاتړ زيات شوی او له سرپرست حکومت غوښتنه کوي چې ورزشکارانو ته د ورزش کولو کافي زمينه برابره کړي.
