په پاکستان کې جګړه او ناامني له بل هر وخت اوس زیاته شوې.
د تېرو څو ورځو په موده کې د دې هېواد پر پوځیانو او د نورو امنیتي ادارو پر کارکوونکو له ۶۰ ډېر بریدونه شوي او درنه مرګ ژوبله یې اړولې ده.
د دغو بریدونو په پایله کې له ۴۰ زیات امنیتي ځواکونه وژل شوي او د ملکیانو په شمول لسګونه نور ټپیان دي.
اوس اندېښنه دا ده چې د پاکستان دغه نا امني به د دې هېواد ګاونډیو هېوادونو او ټولې سیمې ته هم سرایت وکړي.
د سیاسي چارو کارپوهان وايي، مخکې له دې چې په پاکستان د ناامنیو د بل شوي اور او ترهګرۍ د روزنې سپرغۍ سیمې او نړۍ ته ورسیږي، په کار ده چې پر وړاندې یې جدي اقدام وشي او د ترهګرۍ د ملاتړ او روزنې هغه سرچینې له منځه یوسي چې د تېرو۷ لسیزو راهیسې یې د ځان پر ګټه جوړې کړې دي.
د سیاسي چارو شنونکی شهزاده مسعود وايي: « ښکاره خبره ده چې په نورو ګاونډیانو هم خپلې منفي اغېزې لري، زما په اند ښه خبره دا ده چې نړیواله ټولنه او د سیمې هېوادونه خپله ځانګړې پاملرنه هغه ځای ته واړوي، چېرې ترهګر روزل کېږي او امکانات په لاس ورکول کېږي. دوی باید اصلي ریښه پيدا کړي او له بېخه یې وباسي؛ بیا په سیمه او نړۍ کې امنیت او ثبات راشي.»
د سیاسي چارو شنونکی حکمت الله حکمت وايي:« په دې خاوره کې جګړه کول د پاکستان د نورو ستونزو د حل لپاره د پاکستاني پوځیانو په فکر، د حل لاره ده. باید په ډېر دقت او سیاسي شعور سره د دې جګړې په مقابل کې تدابیر ونیول شي.»
د شنونکو اندېښنه دا ده چې پاکستان خپلو ګاونډيو هېوادونو او سیمې ته دا ډاډ نه شي ورکولی چې له دې هېواده به ورته ګواښ نه پېښیږي؛ ځکه چې د دوی ستراتیژیک عمق نورو ته د ترهګرۍ له لارې ګواښ پیدا کول دي.
دوی زیاتوي، له شک پرته په پاکستان کې روانه ناامني د دې هېواد په ګاونډیو او د سیمې هېوادونو په امنیت او اقتصاد ناسم اغېز لرلی شي.
د سیاسي چارو شنونکی زلمی افغانیار وايي: « پاکستانیانو په تېرو درېیو کالو کې هڅه وکړه چې د خپلو سیاسي ګټو ستراتیژيک عمق ترلاسه کړي، خو داسې ونه شوه. اقتصاد محوره حکومت، د نورو هېوادونو په چارو کې لاسوهنه نه کول او د امنیت ټینګول د سرپرست حکومت د بحث موضوع ده. آیا هغه ډاډ چې افغانستان نړۍ او د سیمې هېوادونو ته ورکړی، پاکستان یې هم موږ ته راکولی شي؟ د پاکستان کورنۍ ستونزې په دوی پورې اړه لري او باید خپله یې حل کړي.»
همدارنګه، د ځینې نور بیا وايي، ترهغې چې په پاکستان کې د پنجابي په څېر پښتنو او بلوڅو ته هم حقوق نه وي ورکړل شوي، د پاکستاني پوځ پر وړاندې به جګړه او بریدونه دوام ولري.
دوی په باور دي چې په پاکستان کې د روانو نا امنیو د حل یوازینۍ لاره له سیاسته د پوځ ګوښه کول او په واقعي مانا ملکي حکومت ته د واک سپارنه ده.
د سیاسي چارو شنونکی حکمت الله حکمت وايي: « د خپلو ولسونو او په ځانګړې توګه د پښتنو او بلوڅانو پر وړاندې د پاکستان د پوځ او استخباراتو جګړه، یو ظلم دی. هرڅوک چې د دې ظلم پر وړاندې درېږي، د هغوی جګړه حق ده. که پاکستان غواړي چې خپلې امنیتي ستونزې حل کړي، باید د خپلو ولسونو حقه حقوق ورکړي، ولسواکي واکمنه کړي، ملکي حکومت ته صلاحیت ورکړي، پوځ او استخبارات له سیاست ګوښه کړي؛ دا یې د حل لاره ده، بله حل لاره نه شته.»
د پاکستان تر کنټرول لاندې سیمو کې په وروستیو دوو بریدونو کې مشهور دیني عالم مفتي منیر شاکر ژوند له لاسه ورکړ او دغه راز د بلوچستان په نوشکي سیمه کې د پاکستاني پوځیانو پر بس موټرو د چاودنو له امله ۱۱ پوځیان وژل شوي او له ۱۰ زیات ټپیان دي.
