د پاکستان له لوري د تورخم لارې بندولو ۲۲ ورځې پوره شوې او په دې موده کې يې د بيا پرانیستلو لپاره هلو ځلو هېڅ مثبته بایله نه ده ورکړې.
د پاکستان بهرنيو چارو وزارت د لارې بند پاتې کېدو لامل د افغانستان له لوري کرښې ته څېرمه د تأسيساتو جوړلو ياد کړي او خبرداری يې ورکړی چې په تورخم کې د تأسيساتو جوړولو هڅې ونه درېږي، نو دغه لار به هم تړلې وي.
د پاکستان بهرنيو چارو وزارت وايي:« موږغواړو د تورخم لار خلاصه شي، خو افغانستان لوري ته به ډيورنډ کرښې ته څېرمه د هېڅ ډول تأسيساتو د جوړولو اجازه ور نه کړو. دا د حل وړ موضوع ده. موږ وړاندې دا مساله مطرح کړې او په راتلونکي کې به هم د افغانستان له چارواکو غواړو چې له ورته اقدام لاس واخلي؛ ځکه دغه مساله نه يوازې دواړو خواوو ته خلک له تګ راتګ پاتې کوي بلکې د دواړو هېوادونو ترمنځ سوداګري هم له ستونزو سره مخ کوي.»
په همدې حال کې د افغانستان او پاکستان د سوداګرۍ ګډې خونې چارواکي وايي، د پاکستان دې کار د دواړو هېوادونو ترمنځ پر سوداګرۍ منفي اغېز کړی.
دوی د ستونزې حل لپاره له دواړو خواوو د خبرو پيلولو غوښتنه کوي.
د افغانستان او پاکستان د سوداګرۍ ګډې خونې ریيس نقيبالله ساپی وايي: « د پاکستان له خوا چې په دې وروستیو کې کومې څرګندونې راغلې دي، دا په ټوله کې د افغانستان او پاکستان په تجارتي او اقتصادي اړیکو باندې منفي اغېز کوي؛ ځکه چې دا د یو ډول سیاسي اړیکو قرباني کېږي. زموږ غوښتنه دا ده په ځانګړې توګه د پاکستان له اړخه چې د تورخم لاره د دواړو خواوو لپاره ډېر ارزښت او د دواړو هېوادونو په اقتصاد کې مهم رول لري، نو باید د سیاسي اړیکو ښکار نه شي.»
سوداګر وايي، د تورخم له لارې له پاکستان ۸۰ سلنه وارداتي توکي خوراکي هغه وو چې د پاکستان له لوري د يادې لارې په تړل کېدو سره، روژې کې د يادو توکو بيې لوړې شوې دي.
سوداګر زلمی وايي: « تقریبا ً ۲۲ ورځې وشوې چې د پاکستان له طرفه د تورخم صفري نقطه تړل شوې ده. د کرښې دواړو خواوو ته زموږ په زرګونه کانټینر بند پاتې دي چې هم صادرات او هم واردات په کې دي. له پاکستان څخه افغانستان ته د وارداتو نږدې ۸۰ سلنه لومړني توکي دي. دا چې د روژې میاشتې شپې ورځې دي، خلک دغو موادو ته اړتیا لري؛ که چېرې پاکستان کومه سیاسي ستونزه لري، نو دا باید له ډېپلوماټیکو لاره هواره شي. موږ غوښتنه کوو چې له اسلامي امارت سره دې کېني او دا ستونزه دې حل کړي.»
سوداګر عبدالجبار ساپی وايي: « له څو اوونیو راهیسې د تورخم لاره بنده شوې او له امله یې افغان تجارانو ته میلیونونه ډالر زیان رسېدلی. په ځانګړې توګه هغه اموال چې ترکاري یا مېوې دي، له منځه تللي دي. دا ډېره مهمه ده چې د پاکستان حکومت او د اسلامي امارت حکومت یوې پرېکړې ته سره ورسېږي او د خلکو ستونزه حل کړي.»
د پاکستان بهرنيو چارو وزارت د څرګندونو په اړه مو هڅه وکړه چې د سرپرست حکومت اړوند ادارو غبرګون ترلاسه کړو، خو زموږ اړيکې يې ځواب نه کړې.
د خوړو نړيوالو پروګرام ويلي، د تورخم لارې تړل کېدو له امله د دې پروګرام اړوند۵۰ هغه لارۍ هم د کرښې پورې غاړې ته ايسارې کړای شوې دي چې اړمنو افغانانونو ته په کې خوراکي توکي بار دي.
