لاوروف زیاته کړې:« د داعش او القاعدې په څېر ترهګرې ډلې اوس غواړي، له دې بې ثباتۍ ګټه پورته کړي او په افغانستان کې خپلو بریدونو ته زور ورکړي. په افغانستان کې د مخدره توکو ستونزه لا هم پر ځای ده او د دې وېره شته، چې ګاونډیو هېوادونو ته د کډوالو په مرسته مخدره توکي او ترهګري انتقال شي.»
سرګي لاروف دغه راز زیاته کړه، چې د طالبانو بدیل نه شته او د دوی پر رسمیت نه پېژندل به افغانستان کې د بشري ناورین لامل شي، خو په وینا یې افغانستان کې اوسني وضیعت ته یو ثابت وضیعت نه شي ویلی.
لاوروف زیاتوي:« له یوه اړخه د اټکل شوې راتلونکې لپاره له طالبانو پرته بل بدیل نشته او له بل اړخه، د طالبانو پر رسمیت نه پیژندل، اقتصادي او مالي ستونزې، بشري ننګونې چې اوس ورسره طالبان مخ هم دي، موږ یې ثابت وضیعت نشو بللی.»
د روسیې د بهرنیو چارو وزیر دغه راز له طالبانو وغوښتل، چې پر خپلو ژمنو ودرېږي او ترهګرو ډلو ته باید اجازه ورنه کړي، چې افغانستان د مرکزي اسیا او نورو هېوادونو پرضد وکاروي.
د اسلاميامارت استازي بیا په خپله وینا کې ویلي، په تېر کې هم فشارونو پایله نه ده ورکړې او دوی به هېڅکله د فشار په پایله کې کومې داسې معاملې ته تیار نه شي، چې هغه د افغانانو د غوښتنو او ارزښتونو پر زیان وي.
د رئیس الوزرا مرستیال مولوي عبدالسلام حنفي همدا راز د امریکا پر متحده ایالتو غږ وکړ، د افغانانو کنګل کړې پانګه دې بېرته افغانستان ته ورکړي او د دا ډول فشارونو پرځای دې عامو افغانانو سره مرستې وکړي.
حنفي زیاته کړه:« د امریکا په متحده ایالاتو غږ کوم، چې د افغانستان د مرکزي بانک کنګل شوې پیسې ازادې کړي. دا په حقیقت کې د افغانانو پانګه ده او نه باید زموږ خلک د سیاسي پلمو بیه ورکړي.غواړم واضح کړم، چې اسلامي امارت په تېر کې هم د ملي ارزښتونو، ازادي ساتلو او د ملي ګټو لپاره د هېڅ هېواد فشار ته نه دی تسلیم شوی او نه به داسې معاملې ته تیار شي، چې زموږ خلکو ته د منلو وړ نه وي. د فشارونو پایله په تېر کې څرګنده شوې، چې نتیجه نه لري.»
