د کندهار د سپین بولدک – چمن تر منځ د لارې د خلاصون د خبرو لومړی پړاو بې پایلي پای ته ورسېد

د کندهار د سپین بولدک – چمن تر منځ د لارې د خلاصون د خبرو لومړی پړاو بې پایلي پای ته ورسېد، خو د دوهم پړاو د خبرو احتمال شته.

 ناسته په چمن کې جوړه شوې، د کندهار والي او امنیه قوماندان ترڅنګ یو شمېر سوداګرو د افغان لوري په استازیتوب خبري وکړې.

د افغان چارواکو غوښتنه دا وه چې لار به اتلس ساعته خلاصه وي، له دې غاړې به د لوی کندهار خلک پر تذکرو پرېښودل کېږي او د ها خوا به د جنوبي پښتونخوا اوسېدونکي پر شناخت کارډ او مهاجر کارډ پرېښودل کېږي.

خو پاکستاني لوري د لارې د څلور ساعته خلاصون او یوازې د سپین بولدک او چمن اوسېدونکو پر تذکره د تګ اجازه درلودلو وویل.

د پاکستاني لورې بله غوښتنه پر ډیورنډ کرښه د نهو کلیو ترمنځ د اغزن تار غځول وه، چې د افغان لوري له سخت مخالفت سره مخ شوه.

پاکستان د دوهمې ناسته غوښتنه کړې، ممکن نن شپه او یا سبا وشي.

دغه لاره په کندهار کې د تازه مېوې د فصل له پېل سره سم  له تېرو ۱۲ ورځو راهيسې د طالبانو له خوا د سوداګرو او هر راز تګ راتګ پر وړاندې تړل شوې ده.

د لارې تړل کېدو تر ټولو ډېر زيان د دغه ولایت باغ لرونکو او سوداګرو ته اړولی او په سلګونه موټر تازه مېوه یې د لارې د پرانېستل کېدو په انتظار خراب شوي دي.