د ملګرو ملتونو امنیت شورا د افغانستان وضعیت ارزونې او په تړاو یې د امریکا، روسیې، چین او پاکستان دایمي استازو په ګډون د یو شمېر هېوادونو د درېځ کوربه وه.
په ملګرو ملتونو کې د امریکا دایمي استازې یو ځل بیا له افغانستانه د ترهګرۍ پراخېدا په تړاو اندېښنه ښودلې او له سرپرست حکومت یې غوښتي چې د ترهګرۍ ضد مبارزې په برخه کې خپلې ژمنې عملي او ډاډ ورکړي چې دغه هېواد د وسله والو پر خوندي پټنځای نه بدلېږي.
ډوروټي شې له نړۍ سره د سرپرست حکومت د تعامل پر غوښتنې شک ښودلی او ویلي يې دي، په داسې حکومت باور نه شي کېدای چې په خبره یې له ترهګرو سره اړیکې لري او د خپلو خلکو بنسټیز حقونه او اړتیاوې له پامه غورځوي.
هغې زیاته کړې: « امریکا د دوحې پروسې په لړ کې له نړۍ سره د ښه نیت له مخې تعامل ته د طالبانو پر لېوالتیا شکمنه ده. موږ پر داسې یوې ډلې باور نه شو کولی چې امریکایان بندیانوي، په خپله خاوره کې ترهګرو ډلو ته د پناه ورکولو اوږد تاریخ لري او د خپلو وګړو بنسټیز حقونه او اړتیاوې له پامه غورځوي. موږ مسوولانه عمل کولو ته د طالبانو رابللو پر ګډې غوښتنې اجماع ساتلو په تړاو د ملګرو ملتونو امنیت شورا له غړو سره کار کولو ته په تمه یو.»
د دې خلاف د روسیې استازي د پردیو لیدلورو او د لومړیتوبونو له تحمیل پرته له سرپرست حکومت سره تعامل او ډیالوګ یوازینۍ حل لار، په نړۍ کې د افغانستان د بیاځلې ادغامېدو او له موجوده بن بست د وتلو لپاره حیاتي بللې.
واسلي نبېنزیا د سوله ییز او له نشه یي توکو پاک افغانستان ملاتړ ترڅنګ په هېواد کې د ټولیز او اقتصادي پرمختګ خبره کړې او له نړۍ یې غوښتي چې له سرپرست حکومت سره د ټکر له کبله له افغانانو سره بشري مرستې سیاسي نه کړي.
هغه زیاتوي:« روسیه په جامع ډول په سوله ییز او هوسا هېواد کې چې له ترهګرۍ او نشه یي توکو پاک وي، د افغانانو د ژوند کولو له حق او اړتیاوو ملاتړ کوي. هغه څه چې د سیمې د نظم او ثبات لپاره اړین او کلیدي دي. دوامداره او باثباته سوله هغه مهال شونې ده چې موږ پر افغانانو د نورو لیدلورو او لومړیتوبونو له تحمیل پرته د سرپرست حکومت له چارواکو سره ډیالوګ ته مخه کړو. دا له موجوده بن بست د راوتو او له نړۍ سره د تعامل او بیاځلې ادغام لپاره چې افغانستان پرې تکیه دی؛ یوازینۍ حل لاره ده.»
د چین دایمي استازي د سرپرست حکومت پر چارواکو د سفر بندیزونو د معافیت غځولو ترڅنګ دغه کار له نړۍ سره د اسلامي امارت د تعامل لپاره اړین فکتور بللی.
فو کونګ له ټولو مرستندویه نړیوالو ادارو او سازمانونو غوښتي چې له افغانانو سره خپلې بشري مرستې جاري وساتي او په خبره یې له دې مرستو پر سرپرست حکومت د فشار راوړلو په توګه کار وا نه خلي.
فو کونګ په دې اړه ویلي: « چین د سرپرست حکومت او نړیوالې ټولنې ترمنځ د دوه اړخیز باور له پیاوړتیا او د خبرو اترو له لارې ګډو اندېښتو ته له رسېدو ملاتړ کوي. چین له امنیت شورا غواړي چې د سرپرست حکومت پر چارواکو د سفر پر بندیزونو معافیت وغځوي او په دې برخه کې د ۱۹۸۸زېږدیز کال د بندیزونو رژیم په وخت سره تنظیم کړي، ترڅو له نړۍ سره د سرپرست حکومت تعامل ته لاره هواره شي.»
د دې ټولو خلاف د پاکستان استازي یو ځل بیا تور پورې کړ چې ګڼې وسله والې ډلې د افغانستان له خاورې په ګټه اخیستنې پر پاکستان بریدونه کوي.
منیراکرم ادعا کړې چې دغه وسله والې ډلې له ډېورند کرښې داغاړه خوندي پټنځایونه لري چې په وینا یې هلته د دې هېواد پوځ او ادارې پر نښه کوي.
منیراکرم زیاته کړې:« له بده مرغه له داعش سره د مبارزې سربېره، د کابل چارواکي د القاعدې، ټيټيپي او د مجید برېګډ په ګډون له هغو بلوچ وسله والو سیمې او نړۍ ته د ورپېښو ګواښونو په کابو کولو کې پاتې راغلي چې دا مهال په افغانستان کې دي. ټيټيپي چې دا مهال ۶ زره جنګیالي لري، تر ټولو لویه وسله واله ډله ده چې له افغانستانه فعالیت لري. د کرښې دې غاړه کې د خوندي پټنځایونو په لرلو سره ټيټيپي د پاکستان د پوځ، ملکیانو او ادارو پر وړاندې ګڼ بریدونه کړي چې سلګونه کسانو ته یې مرګ ژوبله اړولې ده.»
په دې ناسته کې افغانستان لپاره د ملګرو ملتونو د سیاسي استازولۍ مشرې روزا اتونبایوا د افغانستان د وضعیت په تړاو راپور وړاندې کړ او له نړۍ سره د تعامل لپاره یې له سرپرست حکومت وغوښتل چې پر افغانانو وضع شوي محدودیتونه لرې کړي.
