د افغانستان لپاره د اسلامي همکاریو سازمان د سرمنشي ځانګړي استازي طارق علي بخیت د ترکیې د بهرنیو چارو وزارت د سوېلي آسیا د چارو له رییس سيگاد ارګیني سره ليدلي.
د ياد سازمان له لوري په دې اړه خپره شوې خبرپاڼه کې ويل شوي، دواړو لورو د افغانستان پر سياسي، بشري او اقتصادي وضعيت بحث کړی.
د اسلامي همکاریو سازمان ویلي: « دواړو خواوو د افغانستان د سیاسي، اقتصادي او بشري مسايلو په ګډون د متقابل اهمیت په برخو کې نظرونه شریک کړل او د همکارۍ د ممکنه لارو په اړه یې بحث وکړ. دوی د اسلامي همکاریو سازمان د اړوندو پرېکړو په رڼا کې د مهمو اندېښنو حلولو لپاره نظرونه او حل لارې ولټول. په دې ناسته کې د افغانانو د ملاتړ او د مختلفو مسایلو په اړه له اصلي چارواکو سره د رغنده خبرو اترو د تعقیب لپاره د دوامداره ښکېلتیا پر اهمیت ټینګار وشو.»
د سیاسي چارو یو شمېر شنونکي د اسلامي همکاريو له سازمان سره د سرپرست حکومت اړيکې مهمې بولي او زياتوي چې سرپرحکومت دې له دې لارې پر نړيواله کچه د اختلافي مسايلو د حل هڅه وکړي.
د سیاسي چارو شنونکی اسلم دانشمل وايي: « په اوسني وخت کې موږ درېیمګړو ته اړتیا لري، ترڅو د افغانستان قضیه له نږدې د ښکېلو اړخونو له خوا تر بحث لاندې ونیول شي، پلانونه او پالیسۍ جوړې شي او په دې سره موږ ورو ورو له اوسني حالت ووځو او لا غوره حالت ته به روان شو.»
خو ځېنې نور بيا د اسلامي همکاریو سازمان له افغانستان سره په همکاري نه کولو تورنوي او وايي، که چېرې له افغانستان سره همکاري نه کوي، نو دغه سازمان د افغانستان پر مسايلو له هېواد بهر د بحث کولو حق نه لري.
د سیاسي چارو شنونکی توریالی ځاځی وايي: « دوی زموږ له هېواد سره کومه همکاري کړې، ولې افغانستان پر رسمیت نه پېژني، ولې دوی اوس د افغانستان د سولې او ثبات په هکله خبرې کوي؟ افغانستان کې خو اوس سوله، امنیت او ثبات راغلي دي. موږ د نړیوالو د استخباراتي کړیو او د دوی د سیاسي اهدافو قرباني شوي یو. نور له دغو سازمانونو او هېوادونو څ تمه او توقع لرل چې زموږ د ګاونډیانو او په ځانګړې توګه ایران او پاکستان په ګډون یې ناروا بشري جنایتونه زموږ په خاوره کې ترسره کړي، دا ستره تېروتنه ده چې موږ بیا پرې اعتماد وکړو.»
د اسلامي همکاريو سازمان چارواکو په بهر کې د افغانستان په اړه د دې بحثونو له پيلولو وړاندې، د پاکستان په کوربه توب غونډه هم ترسره کړه.
په دې غونډه کې ياد سازمان غوښتنه وکړه چې سرپرست حکومت دې په افغانستان کې نجونو ته د زده کړو او ښځو ته د کار کولو اجازه ورکړي.
