د بهرنیو چارو وزارت سرپرست مولوي امیرخان متقي د عمان هېواد د سلطنتي نظام په بلنه دغه هېواد ته په سفر تللی او له عماني چارواکو سره یې د سیاسي اړیکو او دوه اړخیزو همکاریو پر پراختیا خبرې کړې.
بهرنیو چار وزارت عمان ته د متقي د سفر موخه د یاد هېواد له چارواکو سره د سیاسي او اقتصادي اړیکو د ټینګښت ترڅنګ، د کابل او مسقط ترمنځ د دوه اړخیزو همکاریو پراختیا بولي.
د بهرنیو چارو وزارت د ویاند مرستیال ضیا احمد تکل وايي: « د بهرنيو چارو وزير به د عمان سلطنت د بهرنيو چارو وزير سربېره د هغه هېواد نورو لوړپوړو چار واکو سره هم د سیاسي او اقتصادي اړېکو او دوه اړخیزو همکاريو پر پراختيا خبرې وکړي.»
تحلیل کوونکي وايي، په خلیج کې عمان د هغو هېوادونو له ډلې دی چې له غربي نړۍ سره ښې اړیکې لري او له دې هېواد سره د افغانستان اړیکې او د همکاریو پراختیا له سیاسي پلوه د کابل پر ګټه ده.
دوی زیاتوي، اوس عمان او دېته ورته نور هېوادونه پوهېږي چې اقتصاد لرونکی باثباته افغانستان د سیمې او نړۍ پر ګټه دی او اړتیا ده چې نوره نړۍ هم د افغانستان په تړاو د عمان تګلاره غوره کړي.
د سیاسي چارو شنونکی محمد زلمی افغانیار وايي:« عمان د خلیج هېوادونو له ډلې هغه هېواد دی چې له لوېدیځو هېوادونو سره ښې اړیکې لري. ښکاره خبره ده که د افغانستان د ملي ګټو پر محور بحثونه وشي، کولی شي ښه لابیګر و اوسي. زه هیله لرم لکه څرنګه چې د افغانستان حکومت اقتصاد محوره او د نورو په چارو کې د لاسوهنې نه کولو پالیسي غوره کړې، عمان هم له دې پالیسۍ خبر دی او بلنه یې ورکړې، نړۍ هم دې پایلې ته ورسېږي چې د سیاسي ثبات لرونکی افغانستان کولی شي د نړیوال امنیت په ټینګښت کې ښه رول لوبولی شي.»
خو ځينې نور بیا وايي، د عمان سلطنتي حکومت له پيله د افغانستان له حکومت سره ښې اړیکې درلودې او د اسلامي امارت ډېپلوماټان یې منلي دي، خو دا چې اوس یې پر رسمي توګه د اسلامي امارت د بهرنیو چارو وزارت سرپرست ته بلنه ورکړې، د دې ښکارندويي کوي چې د دواړو هېوادونو ترمنځ ژور تعامل موجود دی.
د سیاسي چارو شنونکی محمد سلیم پیګیر وايي: « د عمان سلطنت له هماغه پیل راهیسې له اسلامي امارت سره ښې اړیکې لري، د اسلامي امارت ډېپلوماټان یې منلي. دا چې د افغانستان د بهرنیو چارو وزارت سرپرست ته یې بلنه ورکړې، دا له اسلامي امارت سره د لا ژور او پراخ تعامل مانا لري.»
د بهرنیو چارو وزارت سرپرست مولوي امیرخان متقي ته د عمان سلطنت د بهرنیو چارو وزیر بدر بن حمد البوسعیدي له خوا دغه هېواد ته د سفر بلنه ورکړل شوې وه.
د بهرنیو چارو وزارت په خبره، متقي به د دې سفر پرمهال د خپل عماني سیال ترڅنګ د دې هېواد له یوشمیر نورو چارواکو سره هم پر بېلا بېلو موضوعاتو لیدنې ولري.
