په افغانستان کې لسیزې جګړې، اقلیمي بدلونونه، طبیعي افتونه او د کاري فرصتونو نشتوالی هغه لوی لاملونه دي چې د فقر او بېکارۍ کچه یې لوړه کړې او افغانان يې تر بل هر وخت د نړیوالو مرستو ته اړ کړې دي.
په افغانستان کې د ملګروملتونو سيمه اییز همغږي کوونکی اندریکا راټواټ وايي، اوچا له اړمنو افغانانو سره د مرستې لپاره ۱۹ میلیونه ډالره ځانګړې کړې او دا بودیجه به له افغانانو سره د لومړنیو بشري مرستو برخه کې ولګول شي.
راټواټ زیاته کړې:« په ۲۰۲۵ زېږدیز کال کې له ۵۰ سلنې زیات افغانان چې نږدې ۲۳ میلیونه کیږي او په کې ښځې، هلکان، نجونې او نارینه شامل دي، د ورځني ژوند لپاره بشري مرستو ته اړتیا لري. زه د بېړنیو مرستو له همغږي کوونکې ادارې او د ملګرو ملتونو د بېړنیو مرستو له صندوق مننه کوم چې د مرسته رسوونکو بنسټونو له لارې یې دغو کسانو ته ۱۹ میلیونه ډالره مرسته ځانګړې کړې.»
راټواټ دغه راز ویلي، لسیزو جګړو، بې وزلۍ او اقلیمي بدلونونو افغانان د بشري مرستو له کمښت سره مخ کړې دي.
د نړیوالو اړیکو کارپوهان افغانستان سره د نړیوالو مرستو په کموالي سره جدي اندېښنې څرګندوي او د اقتصادي وضعیت ښه کېدو، فقر او بې وزلۍ کچې راښکته کېدو کې د نړیوالو مرستې مهمې ګڼي.
د نړیوالو اړیکو کارپوه سمیر انګار وايي:« نړیوالې بشري مرستې د افغانستان بحران ځپلو خلکو ژغورنې لپاره مهمې دي، خو روڼتیا او دوامداره حل لارې ارزښت لا زیاتوي. »
له دې سره هم مهاله د اسلامي امارت چارواکي د ملګرو ملتونو بشري مرستې د اقتصادي وضعیت ښه والي لپاره اغېزناکه بولي او د دوام غوښتنه يې کوي.
د اقتصادي وزارت مسلکي معین عبداللطیف نظري وايي:« په اوسنیو شرایطو کې د نړیوالې ټولنې او مرستندوینه بنسټونو مرستې د افغانستان له خلکو سره مهمې دي. زموږ غوښتنه له نړیوالو مرستندویه بنسټونو دا ده چې له افغانستان سره بشري او پرمختیايي مرستو ته دوام ورکړي. »
په ورته وخت کې د ملګرو ملتونو د بېړنیو حالاتو د غبرګون مرکزي صندوق او د افغانستان بشري صندوق د افغانانو له پاره د ۴۸.۵ میلیونو ډالرو بېړنۍ بشري مرستې اعلان وکړ او دغه مرستې به د یوې ګډې، بشپړې او سیمهییزې تګلارې له لارې وېشل کېږي.
ملګري ملتونه یاده بودیجه داسې مهال افغانانو سره د مرستې لپاره ځانګړې کوي، چې په هېواد کې د امریکا مرستو ځنډ سره بشري اړتیاوې تر بل هر وخت زیاتې شوې دي.
