ټاکل شوې چې د فرانسې په کوربتوب د مارچ پر ۷ مه د ملګروملتونو ملتونو علمي، کلتوري او ښوونیز سازمان د افغان ښځو او نجونو د ملاتړ په موخه ناسته جوړوي.
د دغې ناستې د جوړېدو موخه يې د افغان ښځو د ملاتړ لپاره د نړيوالې ټولنې د پوهاوي کچې لوړوالی ښودل شوی په پاريس ښار کې به ترسره شي.
يونسکو په يو بیان کې ويلي، دا ناسته به تر ډېره د افغان ښځو او نجونو پر وړاندې د شته ننګونو په روښانه کولو متمرکزه وي.
یونسکو زیاته کړې:« د افغانستان د ښځو او نجونو په اړه د یونسکو د لوړې کچې کنفرانس، چې د مارچ پر ۷ مه نیټه ترسره کیږي، تر ډېره به د افغان ښځو او نجونو پر وړاندې د شته ننګونو په روښانه کولو متمرکز وي، په دې برخه کې د نړيوالې ټولنې عامه پوهاوي کچې لوړول د دې کنفرانس له اصلي موخې دي.»
یونسکو ویلي، پر نړيواله کچه د افغان ښځو د ملاتړ او د دوی په اړه د پوهاي کچې لوړولو دا کنفرانس په داسې حال کې جوړوي چې په افغانستان کې د نجونو د ازادۍ او د زدهکړو لاسرسي حق ډېر محدود شوی دی.
یونسکو په دې اړه ویلي:«د دې کنفرانس هدف دا دی چې د افغان ښځو او نجونو مانا داره ګډون ډاډمن کړي، ترڅو د تعلیمي فرصتونو، دوامداره ښوونځیو ته لاسرسي او د زده کړو بشپړولو باندې تمرکز وشي.»
په ورته وخت کې د ښځو حقونو خونديتوب په برخه کې فعالې مېرمنې د نجونو پرمخ د ښونېزو بنسټونو د بیا پرانيستلو په تړاو د هر ډول غږ پورته کولو هرکلی کوي او له سرپرست حکومته غواړي چې د اسلامي او ملي ارزښتونوپه رڼا کې له زده کړو محرومو افغان نجونو دا حق د نوي تعليمي کال له پیل سره سم پرځای کړي.
د ښځو حقونو فعاله مژده عزیزي وايي:« له بده مرغه درې کاله کېږي چې افغانې نجونې له یوې ناڅرګنده راتلونکې سره مخ دي. د اسلامي امارت سرپرست حکومت تل ویلي او ټينګار یې کړی چې د اسلامي او ملي ارزښتونو په رڼا کې به د ښوونځيو او پوهنتونونو دروازې پرانیزي. په لومړي سر کې دوی ویل چې په نصاب کې به یو لړ تغییرات راولي، خو د درېیو کالو په تېرېدو سره بیا هم ونه توانېدل چې په نصاب کې بدلون راولي.»
په ورته وخت کې د ملګرو ملتونو د ښځو څانګې په یوه خبرپاڼه کې ویلي، د مارچ پر ۱۳ مه به د افغانستان له دننه او بهر د افغان ښځو په حضور کې یوه ناسته جوړه کړي
. په پام کې ده چې په دې ناسته کې به د امربالمعروف، نهې عن المنکر او شکایتونو اورېدو وزارت د نوي قانون په تړاو له افغان ښځو سره خبرې وشي.
