له تېرو دوو اوونیو راهیسې د تورخم لارې بندېدو افغان لوري ته ګڼې ستونزې جوړې کړې دي.
مسافر او ناروغان وايي، د یادې لارې له تړل کېدو سره يې ستونزې ډېرې شوې او په خبره یې، پاکستاني لوري هر وخت ژمنې ماتې کړې او افغان ولس ته یې زیان رسولی دی.
ناروغ لرونکی فیض محمد وايي: « له موږ سره ناروغان دي او پېښور ته تلو، خو لاره بنده ده او ناروغان مو په ډېر بد حالت کې راته پراته دي. دلته یوازې موږ ته نه، بلکې ټولو خلکو ته ستونزې جوړې دي. کله چې د حکومتونو ترمنځ لانجه راشي، زور یې له عامو خلکو باسي.»
یوبل ناروغ لرونکی خیرالله وايي: « ګڼ شمېر مسافر او ناروغان پراته دي، هر چا ته زیان رسېدلی. د افغانستان او پاکستان حکومتونو ته په کار ده چې لاره له سیاست سره ونه تړي، دوی باید د عامو خلکو په اړه فکر وکړي.»
دلته یوازې ناروغان او مسافر نه دي چې د تورخم لارې تړلو سره يې ستونزې ډېرې شوې، بلکې د سیمې ځايي کاروباریان او سوداګر هم شکایتونه کوي او وايي، کاروبار یې پر ټپه ولاړ دی.
د تورخم اوسېدونکی ګل ولي وايي: « دې طرف ته هم خلک بې وزله دي او له هېچا سره پیسې نه شته. په تورخم کې به یې هره ورځ مزدوري کوله، خو اوس هرڅه کاروبار بند دی او خلک له ډېرې بېوسۍ او ناچارۍ سره مخ دي.»
د تورخم مسوولین وايي، سره له دې چې د لارې د خلاصون لپاره يې هڅې روانې دي، خو ادعا کوي چې پاکستاني لوري د خپلو ژمنو په ماتولو سره، هر وخت د دې غاړې افغانانو ته ستونزې جوړې کړې دي.
د تورخم کمیسارۍ استازی احمدي وايي: « دا کړاو خو پاکستان جوړ کړی، زموږ له خوا هېڅ ستونزه نه شته. زموږ خواته دروازه لاهم خلاصه ده. پاکستان تل له موږ سره چل او فرېب کوي، پر خپلو ژمنو ولاړ نه دي. دوی د کرښې دواړو غاړو ته د افغانانو لپاره ستونزې جوړې کړې دي.»
د تورخم لارې په تړلو سره نه یوازې هلته مسافر او ناروغ لرونکي له ستونزو سره مخ دي، بلکې افغان سوداګرو ته يې هم میلیونونه افغانۍ زیانونه اړولی دی.
