د امریکا ولسمشر ډونالډ ټرمپ په افغانستان کې د بګرام هوایي ډګر له چین سره د سختې سیالۍ لپاره مهم بللی دی او په تازه څرګندونو کې يې یو ځل بیا ویلي، د بګرام هوایي اډه به یې د افغانستان لپاره نه بلکې د چین لپاره هم په خپل واک کې ساته.
ټرمپ د خپلې نوې کابینې په لومړۍ ناسته کې زیاته کړې، په افغانستان کې د میلیاردونه ډالرو په ارزښت د امریکا پوځي تجهیزات پاتې دي او د بګرام هوایي ډګر يې د دغه تجهزاتو لاسته راوړلو او ساتلو لپاره هم مهم بللی.
ټرمپ زیاته کړې: « کله چې موږ له افغانستانه وتلو، نو باید د بګرام هوایي ډګر مو له ځان سره ساتلی وای. د بګرام هوایي ډګر د افغانستان لپاره نه بلکې له چین سره د سختې سیالۍ لپاره ګټور او مهم دی. بګرام په افغانستان کې د امریکا پوځي تجهزاتو ساتلو او لاسته راوړلو لپاره هم خورا ګټور دی. آیا تاسې پوهېږئ چې د بګرام له هوایي ډګر د چین هغه ځای چې اټومي وسلې په کې جوړیږي، یوازې یو ساعت واټن لري؟»
د چارو څارونکي بیا د بګرام هوایي ډګر په سیمه کې یو له ستراتیژیکو نقطو يوه هغه بولي او وایي، امریکا له کلونو راهیسې هڅه کوي دغه ستراتيژیکه نقطه یو ځل بیا لاسته راوړي.
د سیاسي چارو شنونکی شهسوار سنګروال وايي: « موږ په دې پوهېږو چې په جغرافیايي لحاظ او د سوق الجیشي اهمیت له مخې، ریښتیا هم بګرام هوايي ډګر ډېر مهم دی. امریکا په سیمه کې داسې یو خواخوږی هېواد نه لري چې د دوی ګټې وژغوري، په ځانګړې توګه چین سره ګاونډ کې. په دې حساب، له جغرافیايي پلوه همدا د بګرام هوايي ډګر دی چې دوی پرې حساب کولی شي، نو باید دغه هوايي ډګر د دوی په واک کې وي، ترڅو په سیمه باندې کنټرول ولري او خپل اقتصادي سیال چین هم کابو کړي.»
ځينې نور بیا وایي، امریکا هڅه کوي چې له چین سره د سیاسي او اقتصادي سیالیو لپاره بېلابېل مهم ځایونه ولري.
د دوی په خبره، دغه هېواد له اوږدې مودې راهیسې هڅې پیل کړې چې په سیمه کې د چین د پرمختګونو مخه ونیسي.
د سیاسي چارو شنونکی معین ګل څمکنی وايي: « دوی غواړي د چین شاوخوا هېوادونه نا آرامه وساتي او جګړې په کې وي، ترڅو د چین د پرمختګ مخه ونیسي او هم امریکا پر سیمه تسلط ولري. په ډېر ګومان داسې فکر کېږي چې امریکایان به بیا سیمې ته راځي؛ ځکه خو روسانو، ایران او چین وار له مخه دا اندېښنه ښودلې ده.»
د امریکا ولسمشر ډونلډ ټرمپ د ټاکنیزو کمپاینونو پر مهال ویلي و چې له دوی په افغانستان کې د ۸۵ میلیارد ډالرو په ارزښت پوځي تجهیزات پاتې شوي دي.
سرپرست حکومت د ټرمپ د تازه څرګندونو په تړاو څه نه دي ویلي، خو وړاندې یې په ځلونو ویلي چې بګرام هوايي اډه به هېڅ یوه هېواد ته ونه سپاري.
