په تورخم کې ډیورنډ فرضي کرښه کې د افغان او پاکستاني پوځیانو ترمنځ د جګړو پر دوام، تېره ورځ (د کب پر ۱۵مه) د شمشاد ټلویزيون او د دوو نورو رسنیو خبریالان د پاکستاني ځواکونو په ډزو کې ټپيان شوې دي.
د شمشاد خبريال هدايت شاه هدايت او هغه سره دوه نور ځايي خبريالان تورخم ته د افغان او پاکستاني ځواکونو ترمنځ پر ډیورنډ فرضي کرښې د روانې نښتې د خبري پوښښ په موخه تللي وو چې د پاکستان له خوا توغول شوې د هاوان مرمۍ په چرو لګېدلي دي.
تورخم کې د دواړو خواو ترمنځ جګړه په وقفه يي توګه له شاوخوا يوې اوونۍ راهيسې روانه ده او له درنو اقتصادي زیانونو سربېره یې د اسلامي امارت د یوه سرتېري او دغه راز ګڼو پاکستاني عسکرو ژوند اخیستی او ګڼ نور ژوبل شوې دي.
