Skip to content
ازبکستان ته د اسلامي امارت د رییس الوزرا د دویم مرستیال مولوي عبدالسلام حنفي په مشرۍ تللی پلاوی له یو ورځني سفر وروسته کابل راوګرځېد.
د اسلامي امارت ویاند ذبیح الله مجاهد پر خپله ټویټر پاڼه لیکلي، د اسلامي امارت پلاوي له ازبکستاني لوري سره د د دوه اړخیزې سوداګرۍ پر پراختیا، په ځانګړې توګه راتلونکي ژمي کې د سون توکو او لومړنیو توکو کې زیاتوالی، د افغان سوداګرو لپاره په ټرانزیټ کې اسانتیاوې، روغتیایي سکتور کې همکاري، د سرخان – پلخمري ۵۰۰ کیلو ولټ برښنا مزي، او مزار شریف – کابل – پېښور ریل پټلۍ په اړه هر اړخیزې خبرې کړې دي.
د ازبکستان د بهرنیو چارو وزارت هم ویلي، چې په دغه لیدنه کې یې د سرحدونو د امنیت خوندیتوب، د سوداګریزو اړیکو پر پیاوړتیا، روغتیایي برخه کې د مرستو پر زیاتوالي او د انرژۍ او ترانزیټ په هکله مهمې خبرې کړي دي.
ازبکستان ویلي، دواړو لوریو هوکړه وکړه، چې مهمو زیربنایي پروژو ته به جدي پاملرنه کوي، چې د سرخان- پلخمري ۵۰۰ کيلو وولټ برېښنا مزي او مزارشريف – کابل – پېښور رېل پټلۍ د جوړولو په تړاو دواړو لوریو یو لړ توافقات هم وکړل.
ذبیح الله مجاهد لیکلي، د ازبکستان او افغانستان ترمنځ په ګڼو برخو کې ګډ کاري ټيمونه رامنځته شول، چې پر اړوندو موضوعاتو به تفصیلي خبرې کوي او خپلو-خپلو مشرانو ته به د راتلونکو ګامونو لپاره د لسو ورځو په موده کې لارنقشې بشپړوي او د دواړو غاړو مشرانو ته به د پرېکړو لپاره وړاندې کېږي.
