د کابل ښار په زړه ده افغانانو کې د کتاب ښار په نوم ټولنې له خوا د کتابونو اووه ورځنی نندارتون پرانیستل شوی.
د دې نندارتون پر څلورمه ورځ ګډونوال شکایت کوي چې د تمې خلاف يې نندارتون ته ډېر خلک نه ورځي.
دوی له کتاب سره د خلکو د لېوالتیا کمېدو لامل د هېوادوالو ناوړه اقتصادي وضعیت بولي.
د نندراتون یو تن ګډونوال صهیب وايي: « لوی لامل خو یې دا دی چې د افغانستان د خلکو اقتصاد اوس ډېر کمزوری شوی. بله دا چې له کتاب سره د خلکو علاقه بېخي ورکه ده، ډېر خلک له انټرنېټ ګټه اخلي او کتاب ته هېڅ اهمیت نه ورکوي. خلک وايي چې کتاب اخلم، ولې په دې پیسو کور ته څه نه وړم. موږ له دوکانونو کتابونه دلته راوړي د بازار منځ ته، خلکو ته تبلیغ کوو چې کتابونه په لوی تخفیف سره وپېري، خو بیا هم څوک نه راځي. که اقتصاد ښه شي، هرڅه به ورسره ښه شي، کتابونه به هم بازار پيدا کړي.»
یو شمېر نور ګډونوال بیا د مطالعې دود کمرنګه کېدل د ځوانانو له لوري د خواله رسنیو او انټرنېټ ډېره کارونه بولي او له ټولو غواړي چې باید خپل وخت مدیریت او مطالعې ته يې هم ورکړي.
د نندراتون ګډونوال احمد زبېر وايي: « له بده مرغه زموږ خلک او ځوانان د خواله رسنیو په دام کې بند شوي او خپله شپه ورځ په انټرنېټ کې تېروي. له ځوانانو په ډېر صمیمیت هیله کوم چې لږترلږه هره ورځ د یوه کتاب دوه درې پاڼې ولولي. تاسو وګورئ که څوک په ورځ کې درې پاڼې کتاب ولولي، په اونۍ، میاشت، کال او ټول عمر کې به یې څومره مطالعه کړې وي.»
پر ناوړه اقتصادي وضعیت سربېره بل لوی لامل په سافټ کاپي او پي ډي اېف بڼه د کتابونو شتون او له دې لارې اسانه لاسرسی دی چې د چاپي کتابونو پلور یې کم کړی.
کتاب پلورونکي وایي، په انټرنېټي بڼه شته کتابونو په پرتله د چاپي کتابونو مطالعه او لوستل ډېرې ګټې لري او باید ټول له چاپي کتابونو ګټه واخلي.
د نندراتون ګډونوال سید الهام فراهي وايي: « ښکاره خبره ده چې د کتابونو هارډ کاپي اسانه ده، ځکه چې ستا په لاس کې وي او هر وخت یې مطالعه کولی شي. د کتابونو سافټ کاپي ستړې کوونکې وي، سترګو ته زیان لري او سم ترې مفهوم نه اخیستل کېږي. زموږ سپارښتنه د کتابونو د هارډ کاپي لوستنه ده.»
خو نندارتون ته ورغلي کسان بيا وايي، د سختو اقتصادي شرايطو له امله هڅه کوي د کتاب پېرلو لپاره پر بېلو کړیو پيسو هم د کور اړتياوې پوره کړي.
که څه هم له نندارتون د ګډنوالو تمې نه دي پوره شوې، خو هیله لري چې په پاتې ورځو کې به د خلکو ورتګ زیات او تمې به يې پوره شي.
