د قطر پلازمېنه دوحه کې له امريکايي پلاوي سره تر دوه ورځینو خبرو وروسته د بهرنیو چارو چارسمبالي وزیر امیر خان متقي او ورسره مل پلاوي د افغانستان لپاره د المان ځانګړي استازي جاسپر ویک او د افغانستان لپاره د المان نومول شوي سفیر ماکوس پوتزیل سره کتلي دي.
بهرنیو چارو وزارت ویلي، دواړو خواوو پرمهمو مسایلو بحثونه کړي او توافق یې کړی،چې ناستو ته به دوام ورکوي.
المان ژمنه کړې،چې افغانستان سره بشري مرستو او اسلامي امارت سره اړیکو ته دوام ورکوي.
د بهرنیو چارو وزارت د خبرپاڼې یوه برخه:« د المان ځانګړي استازي وویل،موږ غواړو افغانستان سره بشري مرستو ته دوام ورکړو. اسلامي امارت یو واقعیت دی، خپل تعامل او رابطې ورسره جاري ساتو.»
په دې لیدنه کې د بهرنیو چارو چارسمبالي وزیر امیر خان متقي ویلي، له ټولو هیوادونو سره د مثبت او ښه تعامل غوښتونکي دي.
هغه همدا شان د بشري مرستو کارکوونکو او دیپلوماتانو امنیت ته ژمنتیا څرګنده کړې، ترڅو خپل کارونه په خوندي فضاء کې ترسره کړي.
د المان او کابل ترمنځ توافق شوی دی،چې په راتلونکي کې به هم ورته ناستې ترسره شي.
اخوا د سیاسي چارو یو شمېر تحلیل کوونکي وایي،له بهرنیو هېوادونو سره دا لیدنې او ناستې ګټورې دي،خو هغه هیله چې د اسلامي امات حکومت به په رسمیت وپېژندل شي، د اوس لپاره امکان نه لري،خو اروپایي ټولنه غواړي،د طالبانو نوي حکومت سره فعاله اړیکې وساتي.
د سیاسي چارو تحلیل کوونکی صفت ساپی وايي:« نړۍ او اروپایي ټولنه لېوالتیا نه لري، چې په اوس وخت کې په پوره توګه د طالبانو حکومت په رسمیت وپېژني،خو د اړېکو د فعال ساتو لپاره ټول هڅه کوي،طالبانو سره اړیکې ولري.»
د قطر پلازمینه دوحه کې امریکا او المان سره د اسلامي امارت چارواکو دغه لېدنې داسې مهال ترسره کېږي،چې مسکو په نږدې ورځو کې د افغانستان په اړه یوې نړیوالې ناستې ته چمتووالی نیولی او ټاکل شوې ده،چې د روانې اکتوبر میاشتې په ۲۰ نيټه ترسره شي،چې ښايي د ملګرو ملتونو او اروپایي ټولنې استازي هم په کې برخه واخلي.
