په افغانستان کې د ملګرو ملتونو د مرستندویه ادارې(یومانا) مشرې ویلي، په افغانستان کې د اسلامي امارت ځینې تګلارو د بشري مرستو د پراخوالي کارونه سخت کړي او د خوراکي توکو نا خونديتوب يې د دې هېواد تر ټولو مهمه ننګونه بللې.
روزا اوتونبایوا چې د پرینسټون امریکايي پوهنتون له محصلینو سره یې خبرې کولې، په هېواد کې د بشري مرستو پر دوام ټینګار کړی او ويلي دي چې د دوی هڅې د افغان کروندګر پر ملاتړ متمرکزې دي.
اوتونبایوا زیاته کړې: « په افغانستان کې د مور او ماشوم د مړینې کچه ډېره لوړه شوې. د طالبانو ځینې تګلارې د دې لامل شوې چې د بشري مرستو د پراخوالي کارونه سخت شي. اوس مهال زموږ تر ټولو مهمه مساله افغانانو ته د تغذیې او معشیت برابرول دي.»
ورته مهال، اروپايي ټولنې هم په افغانستان کې د بشري حقونو په برخه کې د اسلامي امارت پر ځينو پاليسيو نیوکه کړې او ویلي دي، د جنسیت پربنسټ د سرپرست حکومت توپیري چلن د روم له اساسنامې ښکاره سرغړونه ده.
د يادې ټولنې په اعلاميه کې د افغانانو او په ځانګړي ډول د ښځو او نجونو د بشري حقونو نقضولو او محدودولو په برخه کې د امربالمعروف او نهې عن المنکر وزارت د نوي قانون یادونه شوې.
د اروپایي ټولنې اعلامیه زیاتوي: « دا قانون د جنسیت پر بنسټ سرغړونې لا پیاوړې کوي، ټولو ته د زده کړو د لاس رسي حق، د بیان آزادي، په سوله ییز ډول راغونډېدل او د ټولنو جوړیدل، د ښځو او نجونو د تحرکاتو او کار او همدارنګه په ټولنه او عام ژوند کې د ښځو او نجونو د بشپړ، مساوي، معنا دار او خوندي ګډون انکار کوي.»
د سیاسي چارو کارپوه توریالی ځاځی وايي: « طالبان باید هڅه وکړي چې له نړیوالې ټولنې سره د ستونزو هوارولو لپاره له ولس سره لاس یو کړي او د دغو ستونزو لمن ورټوله کړي.»
اسلامي امارت بیا په افغانستان کې اقتصادي وضعیت د نړیوالو بندیزونو له امله زيانمن شوی ګڼي او له نړيوالې ټولنې غواړي چې دغه ډول بندیزونه لرې کړي.
د اقتصاد وزارت مسلکي معین عبداللطیف نظري وايي: « افغانستان کې کوم بشري ناورین نه شته، بلکې دلته شته اقتصادي ستونزې د نا عادلانه بندیزونو او د افغانستان د شتمنیو د کنګل توب له امله دي. له دې سره، اسلامي امارت سترې اقتصادي او کار زیږوونکې پروژې تر لاس لاندې لري، ترڅو ستونزې هوارې او په افغانستان کې د بېوزلۍ جرړې وباسي.»
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ د ملګرو ملتونو د بشري حقونو د شورا ۵۸ غونډې ته د افغانستان د بشري وضعیت په اړه په ۲۰ مخونو کې خپل راپور وړاندې کړی.
نوموړي په خپل راپور کې غوښتنه کړې چې د ښځو په اړه د اسلامي امارت تګلارې دې د نړیوالو قوانینو په چوکاټ کې تعقیب شي.
که څه هم اسلامي امارت تازه په دې اړه څه نه دي ویلي، خو له وړاندې يې د ريچارډ بېنېټ راپورونه له حقیقت لرې او مغرضانه ګڼلي دي.
