د افغانستان کورنیو چارو وزارت ویاند قاري سعید خوستی وايي،په کابل کې د سرینا هوټل ته تر اوسه پورې داسې کوم ګواښ نه دی محسوس شوی او په خبره یې سیمه کې يې اضافي ځواکونه ځای پرځای کړي دي.
خوستي زیاته کړه:«اسلامي امارت کشفي او استخباراتي برخي لګیا دي، امنیت ټینګوي او بریالي وو. موږ داسې تهدید نه وینو. هېله لرو،چي داسي پیښه رامنځته نه شي.»
خوستی وايي، د اسلامي امارت د کورنیو چارو وزارت کشفي او استخباراتي اورګانونه په ټول هېواد کې هڅې کوي،چې د خلکو امنیت خوندي او د پيښو مخنیوی وکړي.
کورنیو چارو وزارت د امریکا د بهرنیو چارو وزارت له خبرپاڼې وروسته د سرینا هوټل شااوخوا سیمو کې ځواکونه ځای پرځای کړي او ډاډ یې ورکړی،چې سیمه امن ده.
د امریکا د بهرنیو چارو وزارت د دوشنبې پر شپه د یوې خبرپاڼې په خپرولو سره کابل کې له خپلو اتباعو غوښتي وو،چې د سرینا هوټل له شااوخوا سیمو دې لیرې اوسي.
د امریکا د بهرنیو چارو وزارت خبرپاڼې یوه برخه:« په کابل کې ټولو میشتو امریکایي وګړو ته خبرداری ورکول کېږي،چې د سیرینا هوټل شااوخوا سیمو څخه دې زر تر زره لرې ولاړ شي.»
بریتانیا هم په کابل کي له خپلو وګړو غوښتنه کړې وه،چې سرینا هوټل ته دې نه نږدې کېږي او د احتمالي برید خبر یې ورکړی و.
د بریتانیا بهرنیو چارو وزارت خبرپاڼې یوه برخه:« په کابل کې ټولو بریټانیوي میشتو ته خبر ورکوو،چې د کابل په هوټلونو کې دې نه پاتې کېږي،په ځانګړې ډول د کابل سرینا هوټل څخه دې ځانونه لرې کړي.»
خو د اسلامي امارت مسوولین وايي،سیمه کې یې اضافي ځواکونه ځای پرځای کړي او د هرډول پيښې مخنیوی کولی شي.
