د ۱۳ میلیونه افغانیو په لګښت د خوست په اداري کمپلېکس کې د طبيعي پېښو پر وړاندې د مبارزې لپاره د چمتووالي ملي ادارې په مالي لګښت د جوړېدونکې دوه پوړیزې ودانۍ او ګودام د بنسټ ډبره کېښودل شوه.
چارواکي وايي، چارې به یې په شپږو میاشتو کې بشپړې شي.
د همدې ادارې چارواکي زیاتوي،له خوست سربېره ميدان وردګو او کاپيسا ولايتونو کې هم د دا ډول ودانيو جوړولو کارونه روان دي او د دې ترڅنګ به ژر په کندهار او سمنګان ولایتونو کې هم د ۶۵ ميليونو افغانيو په ارزښت، د ورته ودانيو جوړولو چارې پيل شي.
د طبيعي پېښو پر وړاندې مبارزې لپاره د چمتووالي ملي ادارې د تدارکاتو رییس احمد شاه ذهین وايي:« زموږ اداره په پلان کې لري چې د ټول افغانستان پر کچه هغو ولایتونو کې چې ګودامونه او ودانۍ نه لري، د ټولو لپاره اساسي اداري ودانۍ او ګودامونه جوړ کړي. زموږ ټیمونه په ډېرو ولایتونو کې بوخت دي او د پېښو د مخنیوي ساحې په ګوته کوي، ترڅو موږ ورته استنادي دېوالونه جوړو یا نورې پروژې پلې کړو.»
بل پلو، خوست کې د طبيعي پېښو پر وړاندې مبارزې لپاره د چمتووالي رياست مسوولین وایي، دا مهال دوی خپلې چارې د بدني روزنې آمريت لپاره جوړه شوې ودانۍ کې مخته وړي.
د دوی په خبره، که خپله اداري ودانۍ يې جوړه شي، نو د اداري چارو ترڅنګ به د طبیعي پېښو د مخنیوي او ژر رسېدنه کې هم اسانتیاوې رامنځته شي.
د خوست طبیعي پېښو پر وړاندې مبارزې ریاست کې طبیعي پېښو ته د رسېدو آمر کلیم ګل عابد وايي:« له دې سره به زموږ اداري چارې ډېرې منظمې او هغه ستونزې به هوارې شي چې له دې وړاندې مو د ادارې تعمیر او ګودام نه لرلو له امله لرلې، همدارنګه موږ به د خپلو خوراکي او غیر خوراکي توکو د ساتلو لپاره ځای ولرو.»
د خوست د والي مرستیال محبوب شاه قانت وايي: « د افغناستان اسلامي امارت په تېرو درې نیمو کالو کې داسې انکشافي کارونه وکړل چې د نظامونو لپاره یو چلینج دی.»
د مالوماتو له مخې، خوست کې لاهم ځينې رياستونه او آمريتونه شته چې خپلې اداري ودانۍ نه لري یا په کرايي کورونو او يا هم نورو نامناسبو ځايونو کې اداري چارې مخته وړي.
