د سټنډرډ ملي ادارې چارواکو د حکومت د رسنیو مرکز کې یوه خبري کنفرانس ته خبرو کې وویل، انرژي د هېواد د ځان بسیاینې او پرمختګ په برخه کې مهم رول لري او ضایع کول یې د ودانیزو او بنسټېزو چارو لپاره ستره ننګونه ده.
دغې ادارې د انرژۍ د ښه مدیریت او پراختیا په موخه، د مشورتي، لېبل لګونې، تفتیش او د انرژۍ د مدیریت بنسټ (لېمه) سره د ګډې همکارۍ تفاهم لیک لاسلیک کړ چې پر بنسټ به یې د انرژۍ د ضایعاتو کمولو او ملي سټنډرډونو د تطبیق په برخه کې پرمختګ راشي.
د سټندرد ملي ادارې رییس ملا فیض الله تمیم وايي: « له همدې امله د مشورت، لېبل ګونې، تفتیش او د انرژۍ د مدیریت بنسټ(لېمه) سره د دې تړون لاسلیک زموږ لپاره ځانګړی ارزښت لري؛ په ځانګړي ډول د انرژۍ ښه مدیریت ته لاره هواروي. موږ په دې باور یو چې د حکومتي ادارو او تخصصي بنسټونو ترمنځ همکاري او همغږي کولی شي افغانستان د پرمختګ او ځان بسیاینې پر لوري بوځي.»
د دې ادارې چارواکي زیاتوي، په ودانیو کې د انرژۍ د ضایعاتو مخنیوي لپاره د ملي او نړیوالو سټنډرډونو په استفادې د تحقیقاتې پروژو ترسره کول او په دې برخه کې د متخصصینو روزل، د اړتیا وړ علمي اسنادو او مدارکو تدوین او تالیف، په ودانیو کې د انرژۍ ساتلو لپاره د مشخص کوډ جوړول او په ودانیو کې د انرژۍ د ضایعاتو مخنیوی او د متخصصینو د ظرفیت لوړول د دې تفاهم لیک له اساسي موخو دي.
چارواکي له اړوندو ادارو د همکارۍ غوښتنه وکړه او په خبره یې د حکومتي ادارو او تخصصي بنسټونو ترمنځ ښه او ګډه همکاري د ښې حکومتولۍ لپاره اړینه ده.
د سټندرد ملي ادارې تخنیکي مرستیال مولوي محمد آصف قانت وايي: « موږ ژمن یو چې د دې همکاریو له لارې د انرژۍ مدیریت علمي معیارونه جوړ او کیفیت یې لوړ کړو. دغه راز دولتي او خصوصي سکټورونه وهڅوو چې د انرژۍ سپما ته پاملرنه وکړي. په دې برخه کې د مختصصینو، خصوصي سکټور او علمي مرکزونو همکارۍ ډېر ارزښت لري.»
له بلې خوا، د لېمې مشورتي بنسټ د مسوولینو په خبره له یوه نیم کال پرله پسې هڅو وروسته وتوانېدل چې دغه تفاهم لیک د سټنډرډ ملي ادارې سره لاسلیک کړي او دا یې د سټندرډ جوړونې لپاره مهم ګام یاد کړ.
د یاد بنسټ مشر انجنیر محمد عمر تیموري د نیوکې په توګه د سټنډرډ ملي ادارې اوسنی وضعیت زوړ وګاڼه او په دې برخه کې یې د جدي اقداماتو غوښتنه وکړه.
تمیوري په دې اړه وايي: « موږ اوس هم په هماغه ځای کې یو چې له نن ۶۰ کاله وړاندې وو. د مثال په توګه، تاسو د وزیر محمد اکبر خان روغتون ته ورشئ او بیا ورشئ هغو روغتونونو ته چې اوس نوي جوړېږي، تاسو به خپله توپیرونه ووینئ. آیا نړۍ هم په تېرو ۶۰ کالو کې زموږ په څېر ویده وه؟ نه هېڅکله نه؛ بلکې نړۍ کار کړی او سټنډرډونه یې جوړ کړي دي.»
مسوولینو په دې کنفرانس کې د سټنډرډ ملي اداره د هېواد له مهمو ادارو وبله او ډاډ یې ورکړ چې د علمي او تخنیکي معیارونو په پام کې نیولو، ګډې همکارۍ او د هوکړه لیک په تطبیق سره به د انرژۍ د مصرف او مدیریت برخه کې مهم او اساسي رول ولوبوي.
