ځينو نړیوالو رسنیو راپور ورکړی چې د پیټر رينالډز او باربي رینالډز په نومونو دوه بریټانوي اتباع چې ښځه او خاوند دي، په افغانستان کې نيول شوي دي.
د يادو دوو بریټانويانو کورنۍ رسنيو ته ويلي، دواړه له شاوخوا دوو لسيزو راهيسې په افغانستان کې مېشت وو او له ۱۷ ورځو راهيسې يې ورسره اړيکه پرې شوې ده.
دوی ادعا کړې چې د کورنۍ دا غړي يې د سرپرست حکومت له لوري نيول شوي او په همدې موخه يې له سرپرست حکومت په يوه ليک کې چې اسوشيېټيډ پرېس خبري آژانس يې د ليدلو ادعا کړې، د دوی د خوشې کولو غوښتنه کړې.
د بریټانوۍ کورنۍ ویلي:« هغوی تل په آزادانه توګه خپل کار کاوه او په دقت سره یې د قوانینو درناوي او اطاعت ته غا ړه اېښې وه. دوی د انګلستان ترڅنګ افغانستان هم خپل کور باله. موږ په مهربانۍ سره د خپل پلار او مور د خلاصون غوښتنه کوو، ترڅو بېرته د ښوونې، روزنې او د افغانستان د خدمت په برخه کې خپل کار ته ستانه شي.»
د سیاسي چارو شنونکی اسلام الدین معارج وايي: « البته په افغانستان کې د بهرنیو اتباعو اختطاف او ورکېدل، د اوسني رژیم په تاریخ کې لومړنۍ پېښه نه ده. حکومتونه مسوولیت لري چې د خپلو اتباعو مصؤنیت، حفاظت او امنیت وساتي. د انګلستان حکومت درې کاله وړاندې خپلو اتباعو ته خبرداری ورکړی و او ورته ویلي یې وو چې له افغانستانه ووځي.»
يادو بریټانويانو د افغانانو لپاره د سوداګرۍ او زده کړو په برخه کې روزنيز پروګرامونه وړاندې کول. د بریټانيا حکومت تر اوسه په دې اړه رسمي څه نه دي ويلي.
د اسلامي امارت ویاند هم د دې کسانو د نیولو او یا نه نیولو په تړاو څه نه وایي، خو زياتوي چې په دې برخه کې د څېړنو له بشپړېدو وروسته به مالومات رسنیز کړي.
د سیاسي چارو شنونکي بیا له بهرنيو پانګوالو او وګړو سره د نرم چلن غوښتنه کوي او زياتوي، د ورته قضيو په اړه اړتيا ده چې وضاحت وړاندې شي.
د نړيوالو اړیکو شنونکی عزیز معارج وايي: « دا سمه ده چې که د یوه هېواد وګړي بل هېواد ته ځي او د کوربه هېواد له قوانینو سرغړونه کوي یا په جرم لاس پورې کوي، آشوب ګري کوي یا سیاسي خلاف کاري کوي، دوی سره قانوني چلن کېږي او هغه کسان چې کورني امنیت ته ډېر خطرناک وي او ستونزې جوړوي، نیول کېږي هم. له دې ټولو سره، په اوسنیو شرایطو کې اسلامي امارت ته په کار ده چې له بهرنیو اتباعو سره نرم چلن کړي؛ ځکه افغانستان په یوه حساس پړاو کې دی او له نړۍ انزوا شوی. زما په اند، نړیوال باید وهڅول شي چې راشي افغانستان ته او د افغانستان له امنیت ګټه واخلي؛ ځکه دا څو کاله نړۍ افغانستان ته په دې سترګه ګوري چې افغانستان به څه وي.»
د نړيوالو رسنيو د راپورونو له مخې، دغه دوه کسان چې له تېرو دوو کالونو راهیسې په بامیانو ولایت کې اوسېدل؛ څو ورځې وړاندې د اسلامي امارت د امنيتي ځواکونو له خوا نیول شوي.
د سیاسي چارو شنونکي که څه هم د قضيې څرنګوالي ته په تمه کېدو ټينګار کوي، خو وایي ورته قضيې ښايي بهرنيو وګړو ته په افغانستان کې د ناخونديتوب پيغام ورکړي.
د سیاسي چارو شنونکی اختر محمد راسخ وايي: « نیول کېدل او لادرکه کېدل نړۍ ته دوه پیغامونه وړاندې کوي؛ یو دا چې د افغانستان جغرافیه لاهم نا امنه ده او دویم دا چې د طالبانو د رسمیت پېژندلو لاره نوره هم سختوي. له دې سره افغانستان نور هم په سیاسي انزوا کې ډوبېږي، د افغانستان د خلکو پر اقتصاد ناوړ اغېز کوي، اړیکو او سیاست ته لوی زیانونه اړوي.»
له دې وړاندې ځینو نړیوالو رسنیو په افغانستان کې د بهرنیو اتباعو د نیولو په تړاو هم راپورونه ورکړي وو، خو اسلامي امارت یې هماغه وخت د نیونې اصلي لامل له قوانینو او اصولو سرغړونه بللې وه.
