د هرات – کابل لویه لاره د هېواد له مهمو ټرانسپورټي لارو یوه ده چې هره ورځ زرګونه مسافر پرې تګ راتګ کوي.
خو دغه لار له خطرونو هم خالي نه ده او اکثریت د مرګونو ټرافیکي پېښو کوربه وي. د هرات اوسېدونکي وایي، یو شمېر موټر چلوونکي پر نشه يي توکو روږدي دي او دا کار د سړکونو د امنیت او مسافرو د ژوند لپاره ستر ګواښ دی.
دوی ټینګار کوي چې باید د موټر چلوونکو پر فعالیتونو څارنه زیاته شي او روغتیایي معاینې يې په منظم ډول ترسره شي، ترڅو د احتمالي خطرونو مخه یې ونیول شي.
د هرات اوسېدونکی جمال الدین وايي: « له هغو مسافر وړونکو شرکتونو چې له دې ځایه کندهار او کابل ته مسافر لېږدوي، له مالکانو یې غوښتنه کوم چې خپلو موټر چلوونکو ته نصیحت وکړي چې په لارو چرس ونه څکوي، موټر په ډېر سرعت ونه ځغلوي ترڅو ټرافیکې حادثې ونه شي.»
د هرات یو بل اوسېدونکی وايي: « پنځه شپږ ساعته دې لاره اوږده، خو په احتیاط دې لاړ شي دا غوره ده. په دغو بسونو کې ۵۰ تر ۷۰ تنو سورلۍ وي او که ټکر وکړي، زیاته مرګ ژوبله اړوي. باید په دې اړه پاملرنه وشي.»
په ورته وخت کې د ټرانسپورټي شرکتونو مسوولین وایي، د موټرچلوونکو د روغتیایي وضعیت څارنې مسوولیت د سرپرست حکومت پر غاړه دی او باید په اړه يې معاینات وکړي.
د یوه ټرانسپورټي شرکت رییس احمدالله په دې اړه وايي: « دا د ټرافیکو دنده ده، دوی باید موټر چلوونکي چک او معاینه کړي. هر کله چې موټر چلوونکي د موټر چلولو جواز یا لایسنس نوی کوي، باید له صحي پلوه چک شي؛ که چېرې کوم موټر چلوونکي نشه يي توکو کاروي، باید جواز ورنه کړل شي. کله چې موټر چلوونکی د چلولو جواز ونه لري، موږ موټر نه ورکوو. نو دا دنده خاص د ټرافیکو ده او موږ پورې اړه نه لري.»
له بلې خوا، د هرات ځايي مسوولین هم دغه ستونزه مني خو وايي، روان کال یې له معاينې وروسته پرنشه يي توکو روږدي سلګونه موټر چلوونکي له دندو لرې کړي دي.
د دوی په خبره، د موټر چلوونکو د روغتيايي وضعیت ارزونې بهیر لا هم دوام لري او هڅه کېږي چې د موټرچلوونکي په توګه د نشه يي توکو کاروونکو کسانو د ګومارنې مخه ونيول شي.
د هرات د نشه يي توکو پر ضد د مبارزې مدیر حیات الله روحاني وايي: « موږ سلګونه کسان معاینه کړل او یو شمېر په کې پر نشه يي توکو روږدي وو او د چرسو عملیان وو، چې موږ ترې د موټر چلولو جواز واخیست.»
د بس موټر چلوونکو له خوا د نشه يي توکو کارونې په تړاو اندېښنې داسې مهل زیاتېږي چې په دې وروستیو کې د هرات- کابل لویې لارې په اوږدو کې ټرافیکي پېښې د يو شمېر مسافرو د ټپي کېدو او مړینې لامل شوې دي.
