افغانستان کې د وسله والو ډلو د ملاتړ په تړاو د پاکستاني چارواکو د ادعاوو په دوام، د دې هېواد مرستیال لومړي وزیر یوځل بیا د ترکیې له ټي.آر.ټي ټلویزیون سره مرکه کې خپلې ادعاوې تکرار کړې دي.
اسحاق ډار چې په ورته وخت کې د پاکستان بهرنیو چار وزیر هم دی، د اسلامي امارت له سرپرست حکومت يې غوښتي چې پاکستان ته ډاډ ورکړي ترڅو افغان خاوره د پاکستان پر وړاندې نه کارول کېږي.
هغه د یوې پوښتنې په ځواب کې ویلي، د پاکستاني طالبانو تحریک(ټي.ټي.پي) مرکزونه د ډیورند فرضي کرښې دواړو خواو ته فعال دي او په خبره یې، څو څو ځلې یې په دې اړه د افغانستان له سرپرست حکومت سره خپلې اندېښنې شریکې کړې دي.
د پاکستان مرستیال لومړي وزیر زیاته کړې: « موضوع دا ده چې ټي.ټي.پي د وسله والو ډلو د مهم اړخ په توګه د افغانستان او پاکستان ترمنځ ډیورند فرضي کرښې دواړو غاړو ته مېشت دي. موږ هغوی ته په ځلونو ویلي او هغوی ته مو نصیحت کړی. هغوی ته مو ویلي چې موږ افغانستان ته د ښو هیلو غوښتونکي یو. موږ د هغوی سوکالي او خوښي غواړو او د سرپرست حکومت له چارواکو سره د اړیکو جوړول غواړو. خو موږ غواړو ډاډ ترلاسه کړو چې افغان خاوره زموږ پر وړاندې نه کارول کېږي. هو! ځینې مسالې او ستونزې شته او موږ یې په اړه شکایت هم کړی او وخت پر وخت په دې برخه له مقابل لوري سره مو ښکېلتیا ساتلې.»
نوموړي پاکستان د افغانستان خیرغوښتونکی ګاونډی بللی چې په خبره یې، دواړه هېوادونه ګډ کلتور، ګډ دین او ګډ تاریخ لري.
اسحاق ډار ویلي، پاکستان په وچه کې د یوه راګیر هېواد په توګه له افغانستان سره د مرستو او همکارۍ دوام ته چمتو دي.
اسحاق ډار په دې اړه زیاته کړې: « پاکستان د افغانستان خیرخواه دی. موږ د یو بل ګاونډیان یو. موږ ګډ کلتور، ګډ دین او ګډ تاریخ لرو. په ساده ژبه، پاکستان د افغانستان خیر غوښتونکی دی او موږ د دغه هېواد سوکالي او پرمختګ غواړو. په وچه کې د راګیر هېواد په توګه موږ له افغانستان سره په تېر کې مرسته کړې او په راتلونکي کې به هم له دې هېواد سره مرستو ته دوام ورکړو.»
اسحاق ډار تېرکال پر افغان خاوره د پاکستان د پوځ هوايي بريد ته په اشارې وايي، که درک کړي چې په هر هېواد کې د پاکستان پر وړاندې کړنې ترسره کیږي؛ نو ورته پوځي غبرګون به وښيي.
د سیاسي چارو تحلیل کوونکي وايي، افغان خاوره هېڅکله د هېڅ هېواد پر ضد نه ده کارول شوې؛ خو برعکس دا ګاونډي هېوادونه دي چې تل یې د ترهګرۍ له پاللو او روزنې د افغانستان پر وړاندې کار اخیستی.
د سیاسي چارو تحلیل کوونکی سلیم پیګیر وايي: « د تاریخ په اوږدو کې د افغانستان له خاورې زموږ هېڅ یوه ګاونډي ته خطر نه دی پېښ شوی. برعکس د ګاونډیو له خاورې پر افغانستان تېری شوی، ترهګر یې روزلي او روزي یې. پاکستانیان باید پوه شي چې افغانستان د ترهګرۍ ځاله نه ده بلکې د ترهګرو ځالې له ډیورنډ کرښې پورې غاړه دي.»
سرپرست حکومت تازه د پاکستان د مرستیال لومړي وزیر اسحاق ډار څرګندونو ته غبرګون نه دی ښودلی؛ خو له دې وړاندې یې تل ورته تورونه رد کړي او د پاکستاني چارواکو دغه ډول ادعاوې یې له خپلو امنیتي ناکامیو تېښته او تر شا پټېدنه بللې.
دا په داسې حال کې ده چې اسحاق ډار درې ورځې وړاندې هم په نیویارک کې د ملګرو ملتونو له سرمنشي انټونیو ګوتیرېش سره د لیدنې پرمهال په افغانستان کې دننه او بهر له ترهګرۍ سره د مبارزې په برخه کې د یاد سازمان د مرستې او ملاتړ غوښتنه کړې وه.
