د اسلامي همکاریو سازمان(او.آی.سي) مرستیال او د افغانستان لپاره د دې سازمان ځانګړي استازي طارق علي بخیت د بهرنیو چارو وزارت له سرپرست مولوي امیرخان متقي سره لیدلي.
د دواړو لورو په دې لیدنه کې پرامنیت، زده کړو، له نشه يي توکو سره پر مبارزې، اقتصاد، بشري او پرمختیايي مرستو او په دې سازمان کې د افغانستان پر استازیتوب خبرې کړې دي.
د بهرنیو چارو وزارت سرپرست په لیدنه کې ویلي، یادو مسایلو ته په کتو په افغانستان کې ځمکني واقیعتونه له هغه څه سره توپیر لري چې په دې تړاو په بهرنیو رسنیو کې مطرح کېږي.
د مولوي امیر خان متقي په خبره، بهرني لوري باید واقیعتونو ته وګوري نه هغه څه ته چې په رسنیو کې ښودل کېږي.
مقتي زیاته کړې:« امنیت، اقتصاد، تعلیم، له نشه يي توکو سره مبارزه، د سیمې او نړۍ له هېوادونو سره مثبت تعامل او نورو برخو کې د اسلامي امارت هڅو او لاسته راوړنو ته په کتو، ځمکني واقیعتونه له هغو ډېر زیات مثبت توپیر لري چې په بهرنیو رسنیو کې ښودل کېږي. بهرني اړخونه باید د رسنیو له خوا وړاندې کېدونکي تصویرونو پر ځای ځمکني واقیعتونه په خپلو سترګو وګوري.»
په همدې حال کې د اسلامي همکاریو سازمان مرستیال او د افغانستان لپاره د دې سازمان ځانګړي استازي په خپلو خبرو کې ویلي، په افغانستان کې د دغه سازمان حضور د دې ښکارندويي کوي چې یاد سازمان غواړي واقیعتونه په خپله وګوري نه د نورو له سترګو.
طارق علي بخیت ویلي، د اسلامي همکاریو سازمان له افغاستانه خپل ملاتړ ته دوام ورکوي.
بخیت زیاتوي: « دا چې موږ دلته حضور لرو، په دې دلالت کوي چې موږ په خپلو سترګو واقیعتونه لیدل غواړو، نه د نور له سترګو. دا چې د بېلا بېلو اړخونو نظرونه اورو، خو په پای کې به پرېکړه په خپلواکه توګه د واقیعتونو په رڼا کې کوو او د اسلامي همکاریو سازمان به له بېلابېلو لارو د افغانستان ملاتړ ته دوام ورکوي.»
د سیاسي چارو کارپوهان بیا د اسلامي همکاریو سازمان د نړۍ پر کچه مهم او اغېزناک سازمان بولي او زیاتوي چې له دې سازمان سره اړیکې او تعامل له سیاسي اړخه د افغانستان پر ګټه دي.
د سیاسي چارو شنونکی محمد جان رسولیار وايي: « دغه سازمان د اسلامي نړۍ او دغه راز ټولې نړۍ پر کچه ډېر مهم سازمان دی او سیاسي پرېکړې یې اغېز لري. دا سازمان د مسلمانانو د حقونو او عدالت د تأمین لپاره کار کوي. له هېوادونو سره یې تعاملات او له هغوی سره یې اړیکې، په ځانګړې توګه د افغانستان له موجوده حاکمیت سره یې روابط ډېر مهم دي. زه هیله لرم د دوی دغه کتنې یوازې تر الفاظو محدودې پاتې نه شي بلکې رسمي دوه اړخیز تعاملات وشي، په دې سازمان کې د افغانستان څوکۍ موجوده حاکمیت ته ورکړل شي.»
د سیاسي چارو شنونکی شهزاده مسعود وايي: « د اسلامي همکاریو سازمان یو نړیوال سازمان دی او که چېرې دلته د دوی استازولي فعاله وي، عیني واقعیتونه به هم په خپلو سترګو ګوري او دا بیا خاص اهمیت لري. زه فکر کوم ښه به دا وي چې په مجموع کې نړیواله ټولنه او افغانستان د یوه مثبت تعامل له لارې تفاهم ته سره ورسېږي، ترڅو د ټولو نړیوالو بنسټونو او سازمانونو استازولۍ په کابل کې موجودې وي.»
په همدې حال کې د اسلامي همکاریو سازمان راغلي پلاوي د امربالمعروف او نهې عن المنکر وزارت له سرپرست سره هم لیدلي.
په دې لیدنه کې له یاد سازمان سره د اړیکو پر پیاوړتیا ټینګار شوی او د امربالمعروف او نهې عن المنکر وزارت سرپرست خالد حنفي زیاته کړې چې د اسلامي همکاریو سازمان کولی شي د افغانستان او اسلامي نړۍ ترمنځ د ښو اړیکو ټینګښت په برخه کې مثبت رول ولوبوي.
