د افغانستان د لومړي وزیر مرستیالانو د بریتانیا له استازو سره لیدنه کې له هغوی غوښتي، چې نړیواله ټولنه دې د افغانستان پانګه بېرته افغانانو ته وسپاري.
ملا عبدالغني برادر او ملا عبدالسلام حنفي تېره ورځ د افغانستان لپاره د بریتانیا له ځانګړي استازي سایمون گاس سره ليدلي او په یو لړ موضوعاتو یې خبرې ورسره کړې دي.
قطر کې د طالبانو د سیاسي دفتر ویاند ډاکتر محمد نعیم پر خپله ټویټر پاڼه د ملا برادر له قوله لیکلي، له بریتانیا او نړۍ سره ښې اړیکې غواړي او له نړیوالې ټولنې یې غوښتنه کړې، چې د افغانستان پانګه بېرته افغانانو ته وسپاري، ځکه په خبره یې دا د افغان ولس حق دی.
سایمون گاس د ملګرو ملتونو او نورو نړیوالو سازمانونو له لارې له افغانستان سره د خپل هېواد د بشري مرستو د دوام ډاډ ورکړی او زیاته کړې یې ده، چې بریتانیا غواړي افغانستان کې رغنده رول ولوبوي، خو په وینا یې دوی ته دا مهمه ده چې نجونو ته د لوړو زده کړو حق ورکړل شي او اسلامي امارت ډاډ ورکړي، چې افغانستان به د نورو هېوادونو لپاره ګواښ نه جوړېږي.
