د کندوز ولایت د سې شنبه پر ورځ د خونړي ځانمرګي بريد کوربه و. دغه بريد د نوي کابل په ځايي څانګې ته څېرمه هغه مهال وشو چې يو شمېر کسان بانک ته د پيسو اخيستلو او جمع کولو په موخه ورغلي وو.
د کندز امنيې قوماندانۍ مسوولین وايي، په دې پېښه کې شاوخوا ۱۲ کسانو ته مرګ ژوبله اوښتې.
دغه بريد پراخ غبرګونونه را پارولي دي. د ریاست الوزرا دفتر د يوې اعلاميې په خپرولو سره دا ځانمرګی بريد غندلی.
د اعلامیې یوه برخه:« د خپلې ژورې خواخوږۍ او تسليت مراتب ټولو زيانمنو شویو ته وړاندې کوم. د شهيدانو لپاره د خدای ج له درباره جنت او ټپيانو ته د بېړنۍ روغتيا دعا کوم. لوی څښتن تعالی ته دعا کوم چې زموږ هېواد په راتلونکي کې له ورته بوږنوونکو پېښو د تل لپاره په امان کې وساتي.»
د دې ځانمرګي بريد مسووليت داعش ډلې منلی او ويلي يې دي چې د برید موخه يې بانک ته ورغلي د امنيتي ځواکونو غړي وو
پر دې بريد ځينو پخوانيو چارواکو هم غبرګون ښودلی.
پخواني ولسمشر حامد کرزي ياد بريد د غندلو ترڅنګ د ټولو اصولو خلاف عمل بللی.
د پخواني ولسمشر حامد کرزي پر اېکس پاڼه لیکل شوي: « په کندوز کې چاودنه چې زموږ هېوادوال په کې وژل شوي او ټپي شوي دي، په شدت سره غندم او شهيدانو ته د جنت، وارثانو ته يې د صبر او ټپيانو ته د خدای ج له درباره د بېړنۍ روغتيا غوښتنه کوم.»
له دې سره، په کابل کې د قطر او ترکيې سفارتونو هم دغه بريد غندلی.
د پوځي چارو شنونکي دغه ډول بريدونو ته په کتو وايي، عام خلک تل د ورته بريدونو قرباني شوي دي.
د پوځي چارو کارپوه اختر محمد راسخ وايي: « په دغو ټولو عملیاتو کې د افغانستان مظلوم، بېچاره او بېوزله خلک قرباني کېږي. چاودنې، ځان وژنې او وسله وال بریدونه د خلکو ترمنځ، پر روغتونونو، ښوونځیو، بانکونو او داسې ځایونو کېږي چې عام وګړي په کې موجود وي. نو ویلی شو چې د هغوی موخه د افغانانو وژنه ده.»
شاوخوا درې مياشتې وړاندې داعش ډلې د کډوالو او بېرته راستنېدونکو چارو وزارت په انګړ کې د شوي برید مسووليت هم ومانه. په هغه برید کې د ياد وزارت سرپرست خليلالرحمن حقاني هم پر شهادت ورسول شو.
