د پاکستان پلازمېنه اسلام اباد کې د روسيي سفير البرټ خوريف له ټاس خبري اژانس سره په یوه مرکه کې ویلي، مسکو په پاکستان او د دې هېواد تر کنټرول لاندې سيمو کې د وسلهوالو ډلو د فعالیت له زیاتوالي انديښمن دی.
خوریف زیاته کړې، پاکستاني چارواکو یادې اندیښنې له مسکو سره شریکې کړې او په خبره يې روسيه چمتوو ده، چې له ترهګرۍ سره د مبارزې په برخه کې د پاکستان په ګډون له افغانستان سره هم همکاري وکړي.
خوريف د پاکستان امنيتي وضعيت په اړه د اندېښنې ښودلو ترڅنګ په افغانستان کې هم امنيت او ثبات د سيمې لپاره حياتي بللی او د همکارۍ ژمنه يې کړې.
هغه په دې اړه ویلي:«په افغانستان کې د سولې او ثبات پياوړتيا او د هغو خطرونو پر وړاندې مبارزه، چې د افغانستان له خاورې متوجې دي، په سيمه کې زموږ ګډه لېوالتيا ده.»
خوریف د پاکستان هغه ادعاوې، چې ډيورنډ فرضي کرښې ته څېرمه ناامنيو کې يې افغانستان دخيل بللی ويلي، چې دا مسايل د دواړو هېوادونو خپلمنځي حل ته اړتيا لري.
سرپرست حکومت که څه هم د دې څرګندونو په اړه تازه څه نه دي ويلي، خو له دې وړاندې يې ويلي، په افغانستان کې هېڅ ډله فعاليت نه لري او نه هم چا ته د امنيت خرابولو اجازه ورکوي.
د سیاسي چارو شنونکي بيا په پاکستان او د دې هېواد تر کنټرول لاندې قبايلي سيمو کې ناامني د دې هېواد د پاليسيو محصول بولي او زياتوي، چې له دې لارې اسلاماباد له نړيوالو د فنډ راټولولو په هڅه کې دی.
د سیاسي چارو شنونکی اختر محمد راسخ وايي:« په دغو بهانو باندې یې د افغانستان جغرافیه یې د تروریزم ښه بستر او طالبان یې د تروریزم پالونکي معرفي کړل او غواړي چې په دغه جګړه کې له غربي نړۍ پوځي او اقتصادي مرستې ترلاسه کړي، ترڅو وشي کولی خپلو موخو ته د غربي نړۍ په پیسو او همکاریو باندې ورسېږي.»
ځينې نور بيا وړانديز کوي او وايي، که مسکو پر رښتيا هم په سيمه کې د ثبات له ټينګښت سره همکاري کوي، نو اسلاماباد دې د ترهګرو ډولو له تمويل او تجهيز را وګرځوي.
د سیاسي چارو شنونکی شهسوار سنګروال وايي:« دوی ته مالومه ده چې داعش اوس په پاکستان کې مرکزونه لري، هلته تموېل کېږي، هلته روزل کېږي، نو ځکه خو ده (البرټ خوریف) چې کومه خبره کړې، پر بنسټیز لحاظ همدا خبره ده. اوس دوی وېره لري چې داعش په پاکستان کې روزل کېږي، که چېرې افغانستان ته په هماغه ځواک باندې راشي، نو د دې امکان شته چې منځنۍ آسیا ته زیان ورسوي.»
شنونکي وايي، د روسيي په ګډون یو شمېر هېوادونه له ترهګرۍ سره د مبارزې برخه کې ښايي رېښتنې نه وي او له پاکستان سره په دې برخه کې د دوی کېدونکې مرستې بېرته د ترهګرۍ پر تمويل لګول کېږي.
