په سویلي او مرکزي آسیا، افریقا او منځني ختیځ کې د یوې مشهورې پراختیايي شبکې بنسټګر او د اهل تشیع اسماعلیه فرقې ۴۹ موروثي امام کریم آغا خان د ۸۸ کلونو په عمر د ورپېښې ناروغۍ له امله ومړ.
د آغاخان شبکې کارکوونکو پرخپله اېکس رسنۍ خبر ورکړی چې کریم آغا خان په ۱۹۶۷ زېږدیز کال د آغا خان بنسټ رامنځته کړ، ترڅو له دې لارې یو شمېر انساني، مالي او تخنیکي ملاتړ ومومي او د نړۍ د بېوزلو او محرومو ټولنو ستونزې پرې هوارې کړي.
د دې شبکې په خبرپاڼه کې راغلي، د آغاخان بنسټ به په خپل ټول توان د نوموړي تګ لاره تعقیب کړي او په نړۍ کې به د پراختیايي خدمتونو لپاره جدي کار وکړي.
د خبرپاڼې یوه برخه: « شهزاده کریم الحسین آغاخان، د شیعه اسماعلیه فرقې امام او د حضرت محمد (ص) مستقیمه اولاده د ۲۰۲۵ کال د فبرورۍ پر څلورمه نېټه د پرتګال پلازمینې په لېزبون کې د ۸۸ کلونو په عمر په داسې حال کې ومړ چې کورنۍ یې ورسره یوځای وه.»
د آغا خان پراختیايي شبکې په خبر پاڼه کې دا هم راغلي چې د کریم آغاخان د ځای ناستي په اړه به ډېر ژر تصمیم ونیول شي.
په ورته مهال د بریټانیا پادشاه چارلس – درېیم، د ملګرو ملتونو سرمنشي انټونیو ګوتېرېش، د نوبل جایزې ګټونکې ملالې یوسفزۍ او د افغانستان پخواني ولسمشر په ګډون د بشري سازمانونو یو شمېر چارواکو د نوموړي پر مړینه خواشیني څرګنده کړې.
د ملګرو ملتونو سرمنشي کریم آغا خان په نړۍ کې د سولې، زغم او مهربانۍ ښه بېلګه یاده کړې ده.
انتونیو ګوتېرېش ویلي: « زه دعالیقدر شهزاده کریم الحسین آغا خان – څلورم مړینې خبر ته خفه یم. هغه زموږ په دې بې ثباته نړۍ کې د سولې، صبر او مهربانۍ یو سمبول و. زه د اسماعلیه ټولنې ټولو غړیو سره خپله ژوره خواخوږي څرګندوم .»
د آغاخان پراختیايي شبکې په افغانستان کې د ښوونې او روزنې، اقتصادي پرمختګونو، فرهنګي میراثونو بیارغونې، روغتیايي سکټور بیا رغونې او بنسټیزو اسانتیاوو په برخه کې خپل فعالیتونه په ۲۰۰۲ زېږدیز کال پیل کړل چې لا هم دوام لري.
د اقتصادي چارو کارپوهان هم په افغانستان کې د آغا خان پراختیايي شبکې فعالیتونه د اقتصادي پروژو، کاري فرصتونو او بیارغونې په برخه کې مهم او اغېزمن ګڼي.
د اقتصادي چارو کارپوه عبدالنصیر رشتیا وايي: « د آغا خان مسیر ډېر کاله کېږي چې په افغانستان کې د روغتیا، ښوونې روزنې، سرپناه جوړونې او فرهنګي برخو کې پراخ فعالیتونه لري. دغې شبکې وکولی شول په فرهنګي، اقتصادي او ټولنیزه برخه کې د افغانستان لپاره ډېرې مثبتې لاسته راوړنې ولري. د دې ترڅنګ ګڼ شمېر افغانانو ته د کار زمینه هم برابره شوې او ډېر خلک له دې لارې ثابت عاید لري. نو ویلی شو چې افغانستان کې د آغا خان بنسټ فعالیتونه د پام وړ و او په بېلابېلو برخو کې احساس کېدای شي.»
د آغا خان پراختیايي شبکه په څه باندې۳۰ هېوادونو کې خپل اقتصادي او پراختیايي بنسټيز فعالیتونه مخته وړي چې نږدې ۷۰ زره کارکوونکي یې پر دندو ګومارلي دي.
