Skip to content
د افغانستان د صنعت او سوداګرۍ خونې مرستیال یونس مومند وايي، په صادراتو کې د پام وړ زیاتوالی راغلی دی.
مومند وايي، اوس مهال هره ورځ له ۳۴۵ تر ۳۸۰ پورې موټر صادرات لري.
یونس زیاته کړه:« دا زموږ لپاره د خوښۍ ځای دی،چې د صادارتو په موټرو کې د پام وړ زياتوالی راغلی دی. هره ورځ له ۳۴۵ نيولې تر ۳۸۰ پورې موټر صادرات لرو،چې دا په خپله د ټولو افغانانو له پاره ښه زېری دی.»
يونس زیاتوي:« د وارداتو په برخه کې د ستونزو د حل ډاډ ورکوو او ډېر ژر به بانکي سیستمونه فعاله شي،تر څو ټول افغانان له دې سيستمونو ګټه واخلي.»
په ورته وخت کې یونس وايي، په وارداتو کې به هم د پام وړ زياتوالی راشي، چې په بازار کې د توکو بيې به هم ورسره ښې شي.
له شااوخوا دوه میاشتو راپدېخوا افغانان له سخت اقتصادي وضعیت او وزګارتیا کړېږي، چې له ملي سوداګرو غواړي،هېواد ته واردات زیات کړي، ترڅو د توکو نرخونه ورسره ټيټ شي.
خو افغان سوداګر بيا په بېلا بېلو برخو کې د ستونزو خبره کوي او وايې، وروستي تحول یې کاروبار اغیزمن کړی او دا مهال د وارداتو کچه د پام وړ ټیټه شوې ده.
افغان سوداګر شېرشاه وايي:« ما مخکې تاته وویل، هغه څه چې راوارديږي، د تجارانو له پاره مشکل د ټي ټي له کبله دی، کمپینيو ته پيسې وليږي، سوداګر نه شي کولای،کمپينيو ته يې وليږي. حواله جيګه ده. بیې هم لوړې ځي، نو بناء که د بانک سهولتونه رامنځ ته شي او فعاله شي، نو انشاءالله چې د نرخونو په برخه کې به هم د پام وړ کموالی راشي.»
یو بل افغان سوداګر ابوعبيدالله وايي:« زموږ له ټولو لوی مشکل د چين وېزه ده. زموږ دا دوه کاله کېږي، چې خلک په کورونو کې ناست دي، زموږ دفترونه هلته دي، کورونه او منشيان هلته دي، دې ټولو باندې مصارف راځي. دا دوه کاله له دې ستونزې سره مخ يو،نه مخکې نظام کې دا ستونزه سمه حل شوه او نه اوس چا زموږ غم کړی دی. »
د صنعت او سوداګرۍ خونې مرستیال یونس م وممند د افغان سوداګرو ستونزې مني،خو ډاډ ورکوي،چې ډېر ژر به شته ستونزې حل کړي.
د سوداګرۍ خونې چارواکي په داسې مهال د وارداتو د زياتوالي خبره کوي،چې اوس مهال په بازار کې د اوړو، غوړو او بورې بيې خورا لوړې شوي او د پلازمینې کابل اوسېدونکې د بيو له لوړوالي شکايت کوي.
